Վրաստանում հետաքննություն է սկսվել պատգամավոր Հենզել Մկոյանին շանտաժի ենթարկելու դեպքի առթիվ

101

Վրաստանի ոստիկանության Սամցխե-Ջավախքի բաժնում հետաքննություն է տարվում Հենզել Մկոյանին շանտաժի ենթարկելու դեպքի առնչությամբ:

Նշվում է, որ հետաքննությունն իրականացվում էՎրաստանի Քրեական օրենսգրքի 181-րդ հոդվածի 2-րդ մասի «Դ» ենթակետով, որը ենթադրում է շորթում՝ խոշոր գումար ստանալու նպատակով, որը ուղեկցվում է զոհի կամ նրա մերձավոր ազգականի նկատմամբ բռնության սպառնալիքով, նրանց ունեցվածքի ոչնչացմամբ կամ վնասմամբ։

Նշված արարքը պատժվում է ազատազրկմամբ՝ չորսից յոթ տարի ժամկետով: 

Օգոստոսի 10-ին «Վրացական երազանք»-ի պատգամավորի փաստաբան Տարիել Մուրմանիշվիլին ճեպազրույցի ժամանակ ասել էր, որ Հենզել Մկոյանը երկու անգամ ստացել է սպառնալիք պարունակող զանգեր: 

«Նրան ասում են, որ պետք է հեռանա քաղաքականությունից և 5 միլիոն դոլար փոխանցի նրանց հաշվեհամարներին, հակառակ դեպքում նրանք սպառնում են սպանել նրան և նրա ընտանիքի անդամներին», – ասել է Մուրմանիշվիլին:

Հենզել Մկոյանը Վրաստանի խորհրդարանի անդամ է 1999 թվականից: Նա երկու անգամ առաջադրվել է նախաձեռնող խմբի կողմից, երկու անգամ եղել է «Ազգային շարժման» անունից օրենսդիր մարմնում, իսկ 2016 թվականից ի վեր ներկայացնում է «Վրացական երազանքը»: 2020 թվականի հոկտեմբերին կայանալիք խորհրդարանական ընտրություններում իշխող կուսակցությունը չի առաջադրել Մկոյանին որպես պատգամավորի մեծամասնական թեկնածու: