Իրանի ԱԳՆ հայտարարությունը՝ Թուրքիայի՝ Սիրիայի հյուսիսում ռազմական գործողություններ իրականացնելու վերաբերյալ
Իրանի ԱԳ նախարարությունը Թուրքիայի՝ Սիրիայի հյուսիսում ռազմական գործողություններ իրականացնելու վերաբերյալ հանդես է եկել հայտարարությամբ:
Պաշտոնական Թեհրանն իր մտահոգությունն է հայտնել Սիրիայի տարածքում Թուրքիայի կողմից իրականացվող գործողությունների առնչությամբ՝ վերահաստատելով իր դիրքորոշումը, որ Թուրքիան պետք է անհապաղ դադարեցնի հարձակումները և իր զորամիավորումները դուրս բերի Սիրիայի տարածքից:
Հիշեցնենք, որ մինչ հարձակումը՝ հոկտեմբերի 8-ին Իրանի արտաքին քաղաքական գերատեսչությունը ևս հանդես էր եկել հայտարարությամբ՝ ընդգծելով, որ Թուրքիայի գործողությունները ոչ միայն չեն փարատի անվտանգության հարցում Անկարայի ունեցած մտահոգությունները, այլև դրանք կհանգեցնեն մարդային և նյութական կորուստների:
Ռազմական գործողություններ սկսելու օրն Իրանի նախագահ Հ. Ռոհանին Թուրքիային կոչ էր արել վերանայել իր որոշումը՝ համոզմունք հայտնելով, որ Անկարան անվտանգության հետ կապված խնդիրները լուծելու համար ճիշտ ճանապարհ չի ընտրել:
Հոկտեմբերի 9-ի գիշերն էլ իրանական լրատվական գործակալությունները տեղեկատվություն հրապարակեցին, որ Թուրքիայի՝ Սիրիայի հյուսիսում ռազմական գործողություններ սկսելու պատճառով Իրանի Մեջլիսի նախագահ Ալի Լարիջանիի՝ նախօրոք ծրագրված այցը Թուրքիա, չեղյալ է հայտարարվել:
