Եթե աշխարհի որևէ երկրի ռազմական հենակետ օգտագործվի Իրանի վրա հարձակվելու համար, ապա այդ հենակետերը ծանր հարձակման կենթարկվեն: Այս մասին հայտարարել է Իրանի ԶՈւ ԳՇ պետ Մոհամմադ Բաղերին բանակի ռազմաօդային ուժերի առաջին ստորգետնյա բազայի բացման արարողության ժամանակ:
«Սիոնիստական ռեժիմը հեռու է մեր երկրից և նրանց ինքնթիռները պետք է օդում լիցքավորվեն, սա այդ ինքնաթիռները թիրախավորելու լավագույն հնարավորությունն է»,- ասել է Բաղերին՝ անդրադառնալով Իսրայելից հնչող սպառնալիքներին:
Բաղերիի խոսքով՝ Իսրայելը փորձում է օգտագործել շրջակա երկրների բազաները:
«Այդ երկրները բռնել են իսլամական աշխարհին դավաճանելու ուղին՝ իրենց հարաբերությունները կարգավորելով սիոնիստական ռեժիմի հետ՝ չիմանալով, որ այդ հարցը ներառված է Իրանի ռազմավարությունում»,- զգուշացրել է Իրանի ԶՈՒ ԳՇ պետը:
Ավելի վաղ տեղեկացրել էինք, որ երեկ կայացել է Իրանի ռազմաօդային ուժերի առաջին ստորգետնյա բազայի բացման արարողությունը:
