Իսրայելի ՊՆ ղեկավար Յոավ Գալանտը հանդիպել է Ադրբեջանի նախագահ Իլհամ Ալիևի և պաշտպանության նախարար Զաքիր Հասանովի հետ:
Հանդիպման ընթացքում Գալանտն ու Ալիևը քննարկել են ուղիներ՝ ամրապնդելու ռազմավարական հարաբերությունները և համագործակցելու ընդհանուր մարտահրավերների հաղթահարման ուղղությամբ: Այս համատեքստում անդրադարձ է կատարվել նաև անվտանգության և արդյունաբերության ոլորտներում համագործակցությանը։
Նախարար Գալանտն իր երախտագիտությունն է հայտնել Ալիևին՝ երկու երկրների միջև հարաբերությունների խորացմանն ուղղված առաջնորդության և անձնական հանձնառության համար՝ նախևառաջ Իսրայելում Ադրբեջանի դեսպանատան բացումը մատնանշելով։
Նշվել է, որ Իսրայելի ՊՆ ղեկավարը հանդիպելու է նաև Ադրբեջանի պետական սահմանապահ ծառայության ղեկավար Էլչին Գուլիևի հետ:
Հիշեցնենք, որ Իսրայելի պաշտպանության նախարարը պաշտոնական երկօրյա այցով ժամանել է Բաքու:
