Եվրահանձնաժողովի ղեկավար Ուրսուլա ֆոն դեր Լյայենը չպետք է գազային համաձայնագիր կնքեր Բաքվի հետ: Այս մասին հայտարարել է Ֆրանսիայի Ազգային ժողովի «Հանրապետականներ» խմբակցության ղեկավար Բրյունո Ռետայոն Գորիսում կայացած ասուլիսում:
Նա ավելացրել է, որ հենց այդ կերպ է աջակցություն ստանում Ադրբեջանի նախագահ Իլհամ Ալիևը, որը հետապնդում է Ղարաբաղի բնակչությանը և ընդհանրապես հայերին:
«Մեզ հետ ժամանած Փարիզի քաղաքապետ Անն Իդալգոն շատ ճիշտ նկատեց, որ շրջափակումը վերածում է Լեռնային Ղարաբաղը բաց երկնքի տակ բանտի, իսկական համակենտրոնացման ճամբարի: Ֆրանսիայի և Եվրոպայի համար պատվի խնդիր է դրան պատասխանելը», – ասել է Ռետայոն։
Նա նշել է, որ Ղարաբաղի 120 հազար բնակիչների, այդ թվում՝ 30 հազար երեխաների համար իրավիճակը լիովին համապատասխանում է Ցեղասպանության հանցագործությունը կանխարգելելու ու պատժելու մասին ՄԱԿ-ի կոնվենցիայի 2-րդ հոդվածին (որևէ խմբի համար այնպիսի կենսապայմանների կանխամտածված ստեղծում, որոնք նախատեսված են դրա լրիվ կամ մասնակի ֆիզիկական ոչնչացման համար):
«Քաղաքական ճնշումն Ադրբեջանի վրա ոչ մի բանի չի հանգեցնի, ուստի»,- ավելացրել է Ռետայոն,- «մնում է կրկնել Անն Իդալգոյի պահանջը. Ֆրանսիայի նախագահը պետք է աջակցի ՄԱԿ-ում բանաձևի ընդունմանը, որը թույլ կտա միջազգային վերահսկողության ներքո բացել Լաչինի միջանցքը հումանիտար տեղաշարժի համար»:
Հիշեցնենք, որ Ռետայոն, ինչպես նաև Փարիզի քաղաքապետ Անն Իդալգոն և Ֆրանսիայի մի շարք այլ քաղաքների ու շրջանների ղեկավարներ Հայաստան են ժամանել 10 բեռնատարից բաղկացած մարդասիրական ավտոշարասյունն ուղեկցելու համար:
Ղարաբաղի բնակչության համար նախատեսված մարդասիրական օգնությունը ներառում է երկարատև պահպանման մանկական սնունդ (այդ թվում՝ մայրական կաթի փոխարինիչներ), ինչպես նաև գեներատորներ և արևային վահանակներ:
Հայաստան ժամանած պատվիրակության կազմում են Ստրասբուրգի և Մարսելի քաղաքապետներ Ժաննա Բարսեղյանը և Բենուա Պայանը, Լիոնի և այլ քաղաքների ներկայացուցիչներ, ինչպես նաև Ֆրանսիայի Ազգային ժողովում հանրապետականների խմբակցության ղեկավար Բրյունո Ռետայոն և Օ դը Ֆրանս շրջանի վարչական խորհրդի ղեկավար Քսավիե Բերտրանը:
Հետևեք մեզ տելեգրամում
