ՀՀ-ում ԻԻՀ դեսպան Աբբաս Բադախշան Զոհուրին «Լուրեր»-ին տված հարցազրույցի ժամանակ անդրադարձել է Պարսից Ծոց-Սև ծով միջազգային ուղիների հնարավոր գործարկման և Հյուսիս-Հարավ միջանցքի կարևորության հարցերին:
Լրագրողի այն դիտարկմանը, թե արդյոք Պարսից Ծոց-Սև ծով միջազգային ուղիների հնարավոր գործարկումը կապված է 44-օրյա պատերազմից հետո ստեղծված իրավիճակի հետ, թե այլ դրդապատճառներ կան տարածաշրջանում կապուղիների ապաշրջափակման համար, դեսպանն ասել է.
-Այս երկու խնդիրները տարբեր են, մի քանի տարի է՝ ինչ խոսվում է Պարսից ծոց-Սև ծով միջանցքի հարցի մասին, և դրանում ներգրավված է մի քանի երկիր: Բանակցություններ են ընթանում Իրանի, Հայաստանի և այլ երկրների՝ Վրաստանի, Հունաստանի և Բուլղարիայի հետ: Այս պետությունները գտնվում են սևծովյան հատվածում, և հետաքրքիր է, որ Պարսից ծոցի կողմում գտնվող այլ երկրներ ևս այս երկաթուղու նկատմամբ հետաքրքրություն են ցուցաբերել: Սա շատ կարևոր է, քանի որ Իրանի և Հայաստանի միջև հարմար տրանսպորտային ուղին կարող է ավելացնել Իրան-Հայաստան առևտրաշրջանառության ծավալը, և հնարավորություն ստեղծել Թեհրանի և Երևանի համար բազմաթիվ շուկաներ մուտք գործելու համար:
Լրագրողի այն հարցին, թե այս պարագայում ինչ ակնկալիքներ կան Հայաստանից, Իրանի դեսպանը նշել է.
«Այս նախագիծը պահանջում է քաղաքական կամք, ֆինանսավորում և լուրջ մոտեցում այն իրականացնելու հարցում: Մենք ուրախ ենք, որ Հայաստանի կառավարությունն առավել քան երբևէ ընդգծում է Հյուսիս-Հարավ միջանցքի կարևորությունը: Իրանը նույնպես հայտարարել է այս նախագծի իրականացմանը մասնակցելու պատրաստակամության մասին: Մենք ունենք ընկերություններ, որոնք լիովին ունակ են իրականացնել այս նախագծի բարդ հատվածները: Հարկ է նշել, որ այս հարցը քննարկվել է նաև մեր Ճանապարհների և քաղաքաշինության նախարարի՝ վերջերս Հայաստան կատարած այցի ընթացքում, և այժմ մենք համապատասխան տեղեկություն ենք փոխանակում»:
Հետևեք մեզ տելեգրամում
