Օրեր առաջ Ադրբեջանի խորհրդարանի պատգամավոր, իշխող «Յենի Ազերբայջան» կուսակցության անդամ Էլդենիզ Սալիմովի կողմից ծառայողական պարտականություններն իրականացնող ոստիկանի նկատմամբ ուժի կիրառման մասին տեղեկատվությունը բուռն քննարկումների առիթ դարձավ ադրբեջանական հասարակությունում, լայնորեն մեկնաբանվեց նաև մամուլում և սոցցանցերի ադրբեջանական տիրույթում։ Պատգամավորը հանդես եկավ հայտարարությամբ, ընդունեց իր սխալն ու ներողություն խնդրեց, սակայն գործն այսքանով չավարտվեց։
Օգոստոսի 3-ին Ադրբեջանի խորհրդարանը հրավիրված արտահերթ նիստի ժամանակ պատգամավորին զրկեց անձեռնմխելիությունից, ինչից հետո դատարանի որոշմամբ՝ Սալիմովի նկատմամբ 3 ամսով կալանքն ընտրվեց խափանման միջոց։
Հանրային-քաղաքական քննարկումներում շեշտվեց, որ պետական մակարդակով գործին նման հնչեղություն տալն ամենայն հավանականությամբ պայմանավորված է քաղաքական պատվերով, քանի որ Ադրբեջանում բազմաթիվ նման դեպքեր են եղել, բայց որևէ մեկի հետ կապված նման մեծ գործընթաց չի սկսվել։
Երեկ ադրբեջանական Azad söz յութուբյան ալիքը, անդրադառնալով թեմային, բացահայտել է գործի հետ կապված հնարավոր քաղաքական շարժառիթները։ Ադրբեջանի խորհրդրանի՝ Միլլի Մեջլիսի սեփական անանուն աղբյուրներին հղում անելով՝ Azad söz-ը հայտնել է, որ պատգամավոր Էլդենիզ Սալիմովի աղմկահարույց ձերբակալության իրական պատճառը եղել է ոչ միայն ոստիկանին վիրավորելն ու ծեծի ենթարկելը, այլև գլխավորապես ալկոհոլի ազդեցության տակ Ադրբեջանի նախագահ Ի․ Ալիևի և առաջին տիկին Մ․ Ալիևայի հասցեին հնչեցրած հայհոյախառն վիրավորանքները։
Հատկանշական է, որ խորհրդարանի արտահերթ նիստի ժամանակ, խոսելով Սալիմովի մասին, պատգամավոր Թահիր Քերիմլին, ամենայն հավանականությամբ տեղյակ լինելով դեպքի մանրամասներին, հարց էր բարձրացրել՝ «ոստիկանը տեր ունի՞, իսկ պատգամավորը ո՞չ», ինչն առաջացրել էր խորհրդարանի նախագահ Ս․ Գաֆարովայի վրդովմունքը։
Նշենք, որ հուլիսի 29-ին պատգամավոր Էլդենիզ Սալիմովը Խաչմազ քաղաքի ռեստորաններից մեկում ալկոհոլի ազդեցության տակ վիրավորել և ուժ է կիրառել ծառայողական պարտականություններն իրականացնող ոստիկանի նկատմամբ, որը պահանջել էր պահպանել կարանտինային ռեժիմի կանոնները։ Գործի նախաքննությունը վարող գլխավոր դատախազույթունը պատգամավորին անձեռնմխելիությունից զրկելու համար դիմել էր Ադրբեջանի խորհրդարանին։
Հետևեք մեզ տելեգրամում
