Ջարեդ Քուշների և Ավի Բերկովիչի թեկնածությունն առաջադրվել է Նոբելյան խաղաղության մրցանակի համար՝ Իսրայելի և արաբական մի քանի երկրների միջև հարաբերությունների կարգավորման միջնորդության առնչությամբ:
««Աբրահամյան արձանագրությունները», որոնք ստորագրվել են 2020 թվականին, վերջին տասնամյակների ընթացքում ամենակարևոր դիվանագիտական բեկումն է Իսրայելի և արաբական երկրների միջև»,- ասել է կոնգրեսմեն Լի Զելդինը, ով Քուշների և Բերկովիչի թեկնածությունն է առաջադրել Նոբելյան մրցանակի համար:
Ջարեդ Քուշները Մերձավոր Արևելքի հարցերով ԱՄՆ նախկին նախագահ Դոնալդ Թրամփի գլխավոր խորհրդականն էր: Իսկ Ավի Բերկովիչը Քուշների հետ 2020 թվականի ԱՄՆ միջնորդության գործընթացում գլխավոր բանակցողն էր:
Հատկանշական է, որ Թրամփը հայտարարել էր, որ արժանի է խաղաղության մրցանակի, քանի որ իր ղեկավարած վարչակազմն է միջնորդել համաձայնագրերի ստորագրումը: Սակայն պարզ չէ, թե ինչու Զելդինը նախկին նախագահին չէր ընդգրկել թեկնածուների շարքում:
Նշենք, որ «Աբրահամյան արձանագրությունները» ստորագրվել են 2020 թվականին, համաձայն որի՝ Իսրայելը կարգավորել է դիվանագիտական հարաբերությունները Սուդանի, Բահրեյնի, Մարոկկոյի և ԱՄԷ-ի- հետ: Վերջին երեք պետությունների հետ Իսրայելն արդեն փոխանակվել է դիվանագիտական ներկայացուցչություններով, իսրայելցի բարձրաստիճան պաշտոնյաները տարբեր մակարդակի այցեր են կատարել այդ երկրներ: Բացի այդ, Իսրայելի քաղաքական շրջանակներում պարբերաբար նշում են, որ Իսրայելը ցանկանում է ընդլայնել «Աբրահամյան արձանագրությունների» շարքը: Սակայն որոշ արաբական երկրներ, օրինակ՝ Սաուդյան Արաբիան, հայտարարել են, որ անհնար է Իսրայելի հետ հարաբերությունների կարգավորումը՝ առանց պաղեստինյան խնդրի լուծման «երկու պետություն սկզբունքով»:
Հետևեք մեզ տելեգրամում
