Իսրայելական Jerusalem Post (JPost) պարբերականում «Իսրայելի մշուշոտ հարաբերությունները Հայոց ցեղասպանության ճանաչման հետ» վերնագրով հոդված է հրապարակվել Հայոց ցեղասպանության 107-րդ տարելիցի հիշատակի ֆոնին:
Իսրայելի Կնեսետի (խորհրդարան) պատգամավոր Մոսսի Ռազը ապրիլի 24-ին այցելել է Հայաստան՝ մասնակցելու Հայոց ցեղասպանության հիշատակի միջոցառումներին: Այնուամենայնիվ իսրայելցի պաշտոնյաների շրջանակում լայն տարածում չունի Հայոց ցեղասպանության ճանաչման խնդիրը:
Ըստ հրապարակման՝ տրամաբանական է թվում, որ Իսրայելը ոգեկոչում է ցեղասպանությունը, քանի որ Իսրայել պետությունը հենց ստեղծվել է հոլոքոստը վերապրածների ջանքերով: Սակայն ինչու՞ մինչ օրս Իսրայելը չի ճանաչում հայոց ցեղասպանությունը:
Հոդվածում վերոնշյալի կապակցությամբ մատնանշվել է 3 պատճառ.
Նախևառաջ՝ շատ երկրներ միայն վերջին շրջանում են սկսել ճանաչել Հայոց ցեղասպանությունը: Օրինակ՝ Սպիտակ տունը տարիներ շարունակ հրաժարվում էր ճանաչել ցեղասպանությունը՝ գտնվելով Վաշինգտոնում ակտիվորեն գործող և թուրքական աջակցությունը վայելող լոբբիի ճնշման տակ: Բայդենն առաջին էր, ով դեմ գնաց Թուրքիայի սպառնալիքներին և անցյալ տարի ճանաչեց ցեղասպանությունը:
Երկրորդ կարևոր պատճառը Անկարայի և Երուսաղեմի սերտ հարաբերություններն են: Այս հարաբերություններն են ազդեցություն ունենում, որ շատ հայ ակտիվիստներ պրոպաղեստինյան դիրքորոշում ունենան:
Հաջորդը Իսրայելի սերտ հարաբերություններն են Ադրբեջանի հետ: Ադրբեջանամետ գրողները հաճախ փորձել են ադրբեջանցիների դեմ կատարվող վայրագությունները վերագրել Հայաստանին: Նշվում է նաև, որ յուրաքանչյուր կողմ փորձում է ստիպել Իսրայելին և իսրայելական լրատվամիջոցներին ճանաչել սեփական պնդումները:
Հոդվածում ընդգծվել է, որ ընդհանուր առմամբ Իսրայելի կողմից Հայոց ցեղասպանության ճանաչման բացակայությունը պայմանավորված է Թուրքիային «չվիրավորելու» կամ «չսադրելու» միտումով:
«Այսպիսով՝ Իսրայելում քաղաքականությունը և Թուրքիային զայրացնելու վախը շարունակում են ստվերում թողնել 100 տարի առաջ հայերի զանգվածային սպանությունների ճանաչումը որպես ցեղասպանություն», նշվել է հոդվածում:
Հետևեք մեզ տելեգրամում
