Թուրքմենստանում ԱՊՀ երկրների գագաթնաժողովի շրջանակներում հանդիպել են ԻԻՀ նախագահ Մասուդ Փեզեշքիանը և ՀՀ վարչապետ Նիկոլ Փաշինյանը: Region Monitor-ի հաղորդմամբ՝ այս մասին հայտնում են իրանական ԶԼՄ-ները:
Փեզեշքիանը, ընդգծելով երկու երկրների միջև համագործակցության լայն հնարավորությունները, նշել է. «Երկու երկրների միջև համագործակցության բազմաթիվ ոլորտներ կան, և հույս ունենք, որ երկկողմ հարաբերությունները բոլոր ոլորտներում առավել քան երբևէ կընդլայնվեն»։
ԻԻՀ նախագահը, անդրադառնալով երկու երկրների հարևանությանը և համատեղ փոխգործակցության ամրապնդման անհրաժեշտությանը, շեշտել է. «Իրանը և Հայաստանը, որպես երկու հարևան երկրներ, պետք է կարողանան տարբեր ոլորտներում փոխգործակցել ու համագործակցել միմյանց հետ: Որքան մեծացնենք մեր կոորդինացումն ու փոխադարձ աջակցությունը, այնքան ավելի շատ պայմաններ կստեղծվեն փոխադարձ վստահության ամրապնդման, փոխըմբռնման խորացման և երկկողմ հարաբերությունների ամրապնդման համար»։
Փեզեշքիանն ընդգծել է երկկողմ հարաբերություններում կայունության պահպանման անհրաժեշտությունը և հայտնել Հայաստանի հետ տարբեր ոլորտներում համագործակցությունը զարգացնելու ԻԻՀ պատրաստակամությունը։
Հետևեք մեզ տելեգրամում
