ԱՄՆ-ի, Ուկրաինայի և եվրոպական կողմի պաշտոնյաները Մայամիում քննարկել են ռուս-ուկրաինական պատերազմի ավարտին ուղղված առաջարկը։ «RegionMonitor»-ի փոխանցմամբ՝ այս մասին հայտնել է «Al Jazeera»-ն։
ԱՄՆ հատուկ բանագնաց Սթիվ Ուիթքոֆը հանդիպումը համարել է «արդյունավետ»․ X-ում հրապարակած հայտարարությունում Ուիթքոֆը նշել է, որ «կառուցողական քննարկումները» վերաբերել են մինչև ձմեռ Ռուսաստանի հետ պատերազմի լարվածությունը նվազեցնելու և այն ավարտելու հնարավոր ուղիներին, ինչպես նաև կայուն ու տևական խաղաղության հաստատմանը։
Հանդիպմանը մասնակցել են «եվրոպական եռյակի»՝ Մեծ Բրիտանիայի, Ֆրանսիայի և Գերմանիայի, Եվրահանձնաժողովի, Ուկրաինայի ու ՆԱՏՕ-ի ներկայացուցիչները։
Քննարկվել են էներգետիկ համակարգի դիմակայունությունը, հացահատիկի արտահանումը, անվտանգության երաշխիքները և ապագա հակամարտությունները կանխելու նպատակով Ուկրաինայի ու Եվրոպայի անվտանգության երկարաժամկետ պայմանավորվածությունները։ Օրակարգում են եղել նաև Ուկրաինայի հետպատերազմյան վերականգնումը, տնտեսական զարգացումը և ԵՄ-ին անդամակցությունը։
Ավելի վաղ ԱՄՆ պետքարտուղար Մարկո Ռուբիոն հայտարարել էր, որ հակամարտությունը հայտնվել է «վտանգավոր փակուղում»։ Նրա խոսքով՝ բանակցային լուծման բացակայությունը մեծացնում է հետագա սրման վտանգը, և հակամարտությունը կարող է տարածվել հարևան՝ ՆԱՏՕ-ի անդամ երկրների վրա։
Միաժամանակ Ռուսաստանի նախագահ Վլադիմիր Պուտինն ուրբաթ ԱՄՆ նախագահ Դոնալդ Թրամփի հետ զրույցում Ուկրաինայի հետ բանակցությունների վերսկսումը քիչ հավանական է համարել՝ վկայակոչելով նախորդ ամիս խորհրդարանական ընտրությունների ընթացքում Մոսկվայի ուղղությամբ անօդաչուների հարձակումները։
Հետևեք մեզ տելեգրամում
