Մարոկկոյի թագավորությունը հարաբերություններ է հաստատում Իսրայելի հետ, իսկ ԱՄՆ-ը, որը միջնորդի դերում էր հանդես եկել, դրա դիմաց ճանաչում է Մարոկկոյի իրավունքները Արևմտյան Սահարայի վիճելի տարածքի նկատմամբ:
Այսպիսով, Մարոկկոն դառնում է արաբական չորրորդ երկիրը, որն այս տարի հարաբերություններ է հաստատում հրեական պետության հետ: Ավելի վաղ Իսրայելի հետ դիվանագիտական հարաբերություններ էին հաստատել ԱՄԷ-ն, Բահրեյնը և Սուդանը:
Մարոկկոյի դեպքում համաձայնության պայմանը Արևմտյան Սահարայի շուրջ վեճում ԱՄՆ-ի կողմից աջակցություն ստանալն էր: Նշենք, որ թագավորությունը 1975թ. վերահսկում է այս տարածքը և վիճարկում դրա պատկանելությունը Պոլիսարիոյի ճակատի՝ տարածքի անկախության շարժման հետ, որի առաջնորդները Ալժիրում տարագրության մեջ են: Մարոկկոն առաջարկում է լայն ինքնավարություն թագավորության կազմում, իսկ Պոլիսարիո ճակատը ձգտում էր անկախության:
ԱՄՆ նախագահ Դոնալդ Թրամփը Մարոկկոյի կազմում Արևմտյան Սահարայի ինքնավարությունն անվանել է հակամարտության միակ ճիշտ, երկարաժամկետ լուծումը:
Հետևեք մեզ տելեգրամում
