Բաղդադը նախատեսում է դաշնային ուժեր վերատեղակայել Թուրքիայի և Իրանի հետ սահմանին: Այս մասին հայտարարել է Իրաքի վարչապետ Մուհամմադ Ալ-Սուդանին:
Հաղորդվում է, որ այս նախաձեռնությունը համաձայնեցված է լինելու Քուրդիստանի տարածաշրջանային կառավարության հետ:
Նշենք, որ Իրաքյան Քուրդիստանի սահմանները հսկվում են փեշմերգայի (քրդական զինված ուժեր) կողմից, որը գործում է Իրաքի պաշտպանության նախարարության ենթակայությամբ:
Հատկանշական է, որ վերջին շրջանում Իրաքի քրդերը թիրախավորվել են ինչպես թուրքական, այնպես էլ իրանական զինված ուժերի կողմից: Պաշտոնական Անկարան քրդերին դիտարկում է «ահաբեկիչներ» և նոյեմբերի 13-ին Ստամբուլի կենտրոնում տեղի ունեցած պայթյունի պատասխանատու է դիտարկում PKK(ՔԲԿ)-ին: Իրանը ևս իր հերթին քրդերին մեղադրում է երկրում բողոքի ակցիաներ հրահրելու մեջ, որը դեռևս շարունակվում է իրանցի քուրդ Մահսա Ամինիի սպանությունից հետո:
Հետևեք մեզ տելեգրամում
