Սաուդյան Արաբիայի թագաժառանգ արքայազն Մուհամմադ բն Սալմանն այսօր հայտարարել է, որ ապագայի քաղաք NEOM-ի նոր նպատակակետն է Սինդալահ կղզում շքեղ հանգստավայրի կառուցումը, գրում է Saudi Press Agency-ն:
Սալմանը հավելել է, որ Սինդալահը դառնալու է տարածաշրջանի ամենահետաքրքիր և գրավիչ զբոսաշրջային վայրը:
Սինդալահ կղզին, գտնվելով Կարմիր ծովում, զբաղեցնում է 840 հազար քառակուսի մետր տարածք: Ակնկալվում է, որ այն բաց կլինի այցելուների համար 2024 թվականի սկզբին՝ թույլատրելով զբոսաշրջիկներին վայելել շքեղ ծառայություններ ու առաջարկներ:
Կղզին դառնալու է զբոսաշրջիկների ամենասիրելի թոփ ուղևորությունը՝ շրջապատված աննկարագրելի բնությամբ և ծովային հրաշալի տեսարանով՝ ունենալով աշխարհի ամենագեղեցիկ կորալային պաշարներից մեկը:
Ավելին՝ Սինդալահը ձգտում է դառնալ գոլֆի նորագույն վայր: Կղզին նաև տրամադրելու է շքեղ սուպերզբոսանավեր, տարբեր կացարաններ՝ սկսած 413 ուլտրա-պրեմիում հյուրանոցային համարներից մինչև 333 բարձրակարգ սպասարկվող բնակարաններ:
«Դա մի վայր է լինելու, որտեղ զբոսաշրջիկները կարող են զգալ NEOM-ի և Սաուդյան Արաբիայի իրական գեղեցկությունը՝ Սինդալահը դարձնելով շքեղ ճանապարհորդության ապագան», – ասել է թագաժառանգը:
Հետևեք մեզ տելեգրամում
