«Հայաստանի համագործակցությունը իր գործընկերների հետ պաշտպանական ոլորտում ուղղված չէ որևէ երկրի դեմ։ Մեր պաշտպանական կարողությունների զարգացումն ուղղված է Հայաստանի անկախության, ինքնիշխանության, տարածքային ամբողջականության պաշտպանությանը և սահմանների պահպանմանը»։
Այս մասին ասել է ՀՀ վարչապետ Նիկոլ Փաշինյան հունական պարբերականին տված հարցազրույցում՝ անդրադառնալով տարածաշրջանային անվտանգության, խաղաղության, հայ-ադրբեջանական բանակցության հարցերին ու «Խաղաղության խաչմերուկ» նախագծին։
Խոսելով տարածաշրջանային հարցերում Թուրքիայի դերի և հայ-թուրքական կարգավորման բանակցությունների մասին ՀՀ վարչապետը նշել է, որ Թուրքիան տարածաշրջանային խաղացող է, և բնական է ակնկալել, որ նա պետք է հավասարակշռված դիրքորոշում որդեգրի տարածաշրջանում տեղի ունեցող տարբեր իրադարձությունների վերաբերյալ։
«Պակաս ուշադրություն չի դարձվում Թուրքիայի պաշտոնական հռետորաբանությանը, որը կարող է ինչպես նպաստել, այնպես էլ վտանգել գործընթացները։ Մյուս կողմից, Հայաստանն ակնկալում է, որ Թուրքիայի հռետորաբանությունը ոչ թե ուղղված կլինի տարածաշրջանային լարվածության ուժեղացմանը, այլ կնպաստի տարածաշրջանում երկխոսության և համագործակցության առաջմղմանը»,-հավելել է նա։
Հետևեք մեզ տելեգրամում
