Իրանի նախագահ Մասուդ Փեզեշքիանն անդրադարձել է«Հեզբալլահի» առաջնորդ Հասան Նասրալլահի սպանությանը:
«Նման ոճրագործությունը ևս մեկ անգամ ապացուցեց, որ այս հանցավոր ռեժիմը [խմբ.՝ Իսրայելը] միջազգային որևէ սկզբունքի և նորմի հավատարիմ չէ»,- հայտարարել է Իրանի նախագահը:
Նա նշել է, որ եվրոպական երկրների ղեկավարների պնդումները, որոնք ՀԱՄԱՍ-ի քաղբյուրոյի ղեկավար Իսմայիլ Հանիեի սպանությանն Իրանի չպատասխանելու դիմաց հրադադար էին խոստանում, բոլորը կեղծ էին:
Իրանի նախագահի խոսքով՝ չպետք է մենակ թողնել լիբանանցի մարտիկներին, քանի որ այդ դեպքում «Իսրայելը հերթով ագրեսիա կգործի դիմադրության առանցքի երկրների դեմ»:
Փեզեշքիանը շեշտել է, որ իսլամական, արաբական երկրները չպետք է անտարբեր մնան Իսրայելի գործողությունների նկատմամբ:
«Թեև այս չարագործներին անհրաժեշտ է վճռական պատասխան տալ, սակայն,պատմական փորձը ցույց է տվել, որ ազատատենչ շարժումներն անհատների սպանությամբ չեն վերանա, և տասնյակ մարդիկ պատրաստ են բարձրացնել հակաբռնապետության և արդարադատության դրոշը»,- հայտարարել է Փեզեշքիանը:
Հետևեք մեզ տելեգրամում
