ԱԺ նախագահ Ալեն Սիմոնյանը՝ լրագրողների հետ ճեպազրույցում հայտնել է, որ Ադրբեջանը, երրորդ ամիսն է՝ չի արձագանքում Հայաստանի՝ խաղաղության հաստատման ուղղությամբ արված առաջարկներին, սակայն, ըստ նրա, բանակցությունները փակուղում չեն հայտնվել։
«Ես չեմ կարծում, որ բանակցությունները փակուղում են հայտնվել, մենք շարունակում ենք ակտիվ աշխատել սահմանազատման, սահմանագծման հարցում»,- ասել է Սիմոնյանը՝ հավելելով, որ ադրբեջանական կողմի կեցվածքը խիստ մտահոգիչ է:
«Դրա մասին խոսում ենք միջազգային բոլոր գործընկերների հետ։ Եվ կարծում եմ, որ լավ կլինի՝ Ադրբեջանը շարունակի խաղաղության գործընթացի մեջ իր մասնակցությունը։ Մենք փաթեթ են ներկայացրել, որի պատասխանին սպասում ենք: Մինչ օրս դրա պատասխանը չունենք»,-ասել է Սիմոնյանը։
ԱԺ նախագահը նաև չի բացառել, որ Ադրբեջանը Հայաստանի հետ բանակցվող փաթեթը կոմունիկացնում է Ռուսաստանի հետ, քանի որ Ադրբեջանի և Ռուսաստանի դաշնակցային հարաբերությունները բավականին մեծ դեր են խաղում և խաղացել վերջին ժամանակների բոլոր իրադարձությունների մեջ:
«Տարածաշրջանում որևէ իրադարձություն տեղի չի ունենում առանց մեծ խաղացողների դրական կամ բացասական միջնորդությունների և միջամտությունների առնվազն փորձերի: Եվ ես կարծում եմ, որ Ադրբեջանի և Ռուսաստանի դաշնակցային հարաբերությունները բավականին մեծ դեր են խաղում և խաղացել վերջին ժամանակների բոլոր գործողությունների մեջ: Օրինակ բերեմ՝ Ադրբեջանի բանակցելու պատրաստակամությունը կոնկրետ ինչ-որ տեղերում և կոնկրետ ինչ-որ տեղերում դրանից հրաժարումը և այլն»,- եզրափակել է Սիմոնյանը։
Հետևեք մեզ տելեգրամում
