ԱՄՆ նախագահ Դոնալդ Թրամփը հավատարիմ է Իրանի հետ երկխոսությանը և այդ թեմայով հեռախոսազրույց է ունեցել Օմանի սուլթան Հայթամ բեն Տարիկ Ալ-Սաիդի հետ։ Այս մասին լրագրողների համար հերթական ճեպազրույցում հայտարարեց Սպիտակ տան մամուլի քարտուղար Քերոլայն Լևիթը։
«Իհարկե, Իրանի դեմ առավելագույն ճնշման քաղաքականությունը շարունակվում է, բայց, ինչպես գիտեք, նախագահը հասկացրել է, որ ցանկանում է տեսնել Իրանի հետ երկխոսություն և խորհրդակցություն՝ միևնույն ժամանակ հստակեցնելով իր տեսլականը, որ Իրանը երբեք չի կարողանա միջուկային զենք ձեռք բերել: Նախագահն այսօր հեռախոսազրույց է ունեցել Օմանի սուլթանի հետ, շնորհակալություն հայտնեց ԱՄՆ-ի և Իրանի միջև առաջին ուղիղ հանդիպումը կազմակերպելու համար և ընդգծեց, որ Իրանը բանակցությունների միջոցով պետք է վերջ դնի իր միջուկային ծրագրին»,-ասել է Լևիթը։
Հիշեցնենք, որ ապրիլի 12-ին Օմանի միջնորդությամբ Իրանի և ԱՄՆ-ի ներկայացուցիչների միջև Մասկատում կայացել է ոչ ուղիղ բանակցություններ: Իրանի պատվիրակությունը գլխավորում էր արտաքին գործերի նախարար Աբբաս Արաղչին, իսկ ԱՄՆ պատվիրակությունը՝ նախագահի հատուկ բանագնաց Սթիվեն Վիտկովը։ Կողմերը մոտ երկու ժամ քննարկել են իրենց դիրքորոշումներն՝ արտահայտելով պատրաստակամություն առաջ շարժվելու փոխընդունելի համաձայնության հասնելու նպատակով։
Հետևեք մեզ տելեգրամում
