Ռուսաստանը սկսել է Իրանին պայթուցիկ նյութեր, զինամթերք և անօդաչու թռչող սարքերի արտադրության համար անհրաժեշտ բաղադրիչներ մատակարարել։ Այս մասին հայտնում է ամերիկյան «NBC» հեռուստաալիքը՝ հղում անելով եվրոպական երկրներից մեկի կառավարության փաստաթղթին։
Ըստ աղբյուրի՝ մատակարարումների նպատակն է օգնել Իրանին վերականգնել զենքի և զինամթերքի պաշարները, որոնք նվազել են ԱՄՆ-ի և Իսրայելի կողմից հասցված հարվածների հետևանքով։ Հրապարակման մեջ նշվում է, որ նման մատակարարումները կարող են վկայել Ռուսաստանի և Իրանի միջև ռազմավարական համագործակցության հետագա խորացման մասին։
Միաժամանակ, հեռուստաալիքը հիշեցնում է, որ Ուկրաինայում պատերազմի առաջին տարիներին իրավիճակը հակառակն էր․ այդ ժամանակ Իրանը ռազմական աջակցություն էր ցուցաբերում Ռուսաստանին։ Թեհրանը Մոսկվային փոխանցել էր «Շահեդ» տեսակի հարվածային անօդաչու սարքեր, ինչպես նաև դրանց արտադրության տեխնոլոգիաներ։
Հետևեք մեզ տելեգրամում
