Ստամբուլում բնակվող Հայաստանի քաղաքացի մի շարք ընտանիքներ 2026–2027 ուսումնական տարվա մեկնարկից հետո դեռ չեն կարողացել իրենց երեխաներին գրանցել հայկական դպրոցներում։ Այս մասին հայտնել է «Ակոս» շաբաթաթերթը։
Թեև Թուրքիայի կրթության նախարարությունից փոխանցվել է, որ «հյուր աշակերտների» վերաբերյալ նոր սահմանափակում չկա, դպրոցները պաշտոնական գրավոր պարզաբանում չեն ստացել։
«Ակոս»-ի հետ զրույցում ՀՀ քաղաքացի Հ. Կ.-ն պատմել է, որ իր հնգամյա դուստրը ծնվել է Ստամբուլում, բայց հայկական դպրոց ընդունվել չի կարողացել։ Նրա խոսքով՝ ընտանիքն ունի Թուրքիայում բնակության և աշխատանքի օրինական թույլտվություններ, իսկ դպրոցների տնօրեններն ընդունելությունը մերժելիս հղում են անում տեսուչների բանավոր ցուցումներին։
«Մյուս երեխաներն արդեն դպրոց են գնում, իսկ իմ երեխան տանն է սպասում։ Պաշտոնյաների հավաստիացումը, թե խնդիր չկա, դպրոցների դռների մոտ ստեղծված իրավիճակը չի լուծում»,- ասել է մայրը։ Նա նշել է, որ եթե հարցը չկարգավորվի, ընտանիքը ստիպված կլինի վերադառնալ Հայաստան, որպեսզի երեխան չզրկվի կրթությունից։
Թուրքիայում գործող կարգավորման համաձայն՝ օտարերկրյա քաղաքացիները կարող են դպրոցներում սովորել «հյուր աշակերտի» կարգավիճակով՝ առանց ավարտական վկայական ստանալու իրավունքի։ Հայկական դպրոցներն այս կարգով շուրջ 14 տարի ընդունել են Հայաստանից երեխաների։ «Ակոս»-ի տվյալներով՝ անցած ուսումնական տարում նրանց թիվը 50 էր։ Սակայն, նախորդ ամիս փոքրամասնությունների դպրոցներում ստուգումներ անցկացրած տեսուչները, ըստ պարբերականի, տնօրեններին բանավոր հայտնել են, որ այլևս չպետք է ընդունեն «հյուր աշակերտների», իսկ արդեն սովորողներին անհրաժեշտ է տեղափոխել պետական կամ մասնավոր դպրոցներ։ Օգոստոսի վերջին Թուրքիայի կրթության նախարարության հետ քննարկումներից հետո փոխանցվել էր, որ նոր կարգավորում չի ընդունվել և դպրոցները շարունակում են աշխատել գործող կանոնների համաձայն։ Դպրոցներին, այդուհանդերձ, պաշտոնական գրություն չի ուղարկվել, ինչի պատճառով որոշ տնօրեններ դեռ խուսափում են նոր աշակերտների գրանցումից։
Հետևեք մեզ տելեգրամում
