ՀՀ ԱԳ նախարար Զոհրաբ Մնացականյանը իսրայելական The Jerusalem Post թերթին տված հարցազրույցում հայտարարել է, որ Իսրայելը պետք է անհապաղ դադարեցնի սպառազինության վաճառքն Ադրբեջանին, քանզի Ադրբեջանին վաճառվող իսրայելական զենքով թիրախավորվում են Հայաստանի քաղաքացիական ենթակառուցվածքները։
Մնացականյանը նշել է, որ թեև ՀՀ և Իսրայելի հարաբերությունները վերջին տարիներին բարելավվել են, հունվարին Իսրայել էր այցելել ՀՀ նախագահը, այնուամենայնիվ, այդ երկրի կողմից արդիական սպառազինության վաճառքն Ադրբեջանին շարունակում է չլուծված խնդիր լինել ՀՀ-ի համար։
«Ադրբեջանին զենքի վաճառքը մահաբեր է՝ Բաքուն երբեք չի վարանում այդ զենքն օգտագործել քաղաքացիական ենթակառուցվածքների, քաղաքացիական բնակչության դեմ։ Մենք հետևողականորեն արծարծելու ենք այս հարցը, այն միշտ մեր օրակարգում է լինելու ինչպես երկկողմ, այնպես էլ բազմակողմ հարթակներում։ Իսրայելը պետք է դադարեցնի մահաբեր բիզնեսն Ադրբեջանի հետ», – ասել է Մնացականյանը։
Անդրադառնալով Տավուշում սրացման օրերին հայկական զինուժի կողմից իսրայելական անօդաչու սարքերի խոցմանը՝ Մնացականյանն ասել է, որ Հայաստանն Ադրբեջանի դեմ գործում է առանց հաշվի առնելու, թե ինչ ծագման է զենքը։
«Մեր զինուժը վնասազերծում է ադրբեջանական զենքերը՝ անկախ դրանց ծագումից», – ասել է նա։
Հետևեք մեզ տելեգրամում
