Վրաստանի պաշտոնական և հանրային դիրքորոշումը Ուկրաինայի հարցում

Ռազմական գործողությունների մեկնարկից հետո հայտարարություններ են տարածել Վրաստանի վարչապետը, նախագահը, ԱԳՆ-ն և այլք։ Երկրի ԱԳՆ-ն հայտարարել է, որ անհանգստացած է Ուկրաինայում զարգացումներով, ինչպես նաև կոչ է արել միջազգային հանրությանը ձեռնարկել բոլոր անհրաժեշտ քայլերը իրավիճակի դե-էսկալացիայի համար։

• Փետրվարի 24-ին ընդդիմությունը դիմել էր նախագահին խորհրդարանում արտահերթ նիստ հրավիրելու համար, նախագահը ստորագրել է դիմումը։ Նիստն ամեն դեպքում, չի իրականացվելու, «Վրացական երազանքը» հայտարարել է, թե ընդդիմությունը շահարկում է Ուկրաինայի թեման ներքաղաքական օրակարգի համար։

• Փետրվարի 24-ին Վրաստանի պատրիարք Իլյա 2-րդը թվիթերյան իր հաշվում գրել էր, որ Ուկարիանայում ռազմական գործողությունները պետք է դադարեցվեն որքան հնարավոր է շուտ, հակառակ դեպքում` այն կվերաճի համաշխարհային ողբերգության։

• Փետրվարի 25-ին Վրաստանի վարչապետը հայտարարել է, որ Վրաստանը չի պատրաստվում մասնակցել Ռուսաստանի դեմ ֆինանսական և տնտեսական պատժամիջոցներին՝ հաշվի առնելով ազգային շահերն ու բնակչության շահերը։

• Վրաստանը չի պատրաստվում անցկացնել Ազգային անվտանգության խորհրդի նիստ։ «Որևէ անհրաժեշտություն չկա այս իրավիճակում անցկացնել ԱԱԽ նիստ։ Իմ ձեռագիրը չէ ԱԱԽ նիստ անցկացնել, PR կամ ինչ-որ շոու կազմակերպել…. Վրաստանին ոչինչ չի սպառնում»։ Այն հարցին, թե արդյոք նախատեսում է որպես սոլիդարություն այցելել Կիև, Ղարիբաշվիլին հայտարարել է, որ Ուկրաինայի օդային տարածքը հիմա փակ է։

• Վրաստանը հումանիտար օգնություն է ցուցաբերելու Ուկրաինային և Ուկրաինայի ժողովրդին։

• Իրակլի Ղարիբաշվիլիի դիրքորոշումը քննադատել է Ուկրաինայի Ռադայի պատգամավոր Ալեքսեյ Գոնչարենկոն, նշելով՝ արդյո՞ք ստոկհոլմյան սինդրոմ է Ղարիբաշվիլիի մոտ։ Ինչ վերաբերում է Կիև գնալու հարցին, Գոնչարենկոն հիշեցրել է 2008թ., երբ Ուկրաինայի նախագահը գնացել էր Թբիլիսի։ Հակառակ պաշտոնական մոտեցմանը հանրային արձագանքն ու ակտիվությունը բավական մեծ է։

• Փետրվարի 24-ին մեծ ցույց է կազմակերպվել Թբիլիսիում՝ ի պաշտպանություն Ուկրաինայի։

• Տարբեր խմբերում վրացիները սեփական տներում և հյուրանոցներում ապաստանելու առաջարկություններ են անում ուկրաինացիներին, ովքեր այժմ Վրաստանում են և օդային հաղորդակցության կասեցման պատճառով չեն կարողանում վերադառնալ Ուկրաինա։

• Մեծ է նաև դժգոհությունը սոցիալական ցանցերում, մարդիկ մեղադրում են իշխանությանը ոչ համարժեք արձագանքի համար։

Հասմիկ Մելիքսեթյան