Քուրդիստանի բանվորական կուսակցությունը (ՔԲԿ) հայտարարել է, որ Իրաքի հյուսիսային շրջաններից մեկում թուրքական ուղղաթիռ է խոցել: Տեղեկությունը հայտնել է քրդական Rudaw լրատվամիջոցը:
Ըստ ՔԲԿ-ի հայտարարության՝ սեպտեմբերի 3-ի գիշերը, երբ թուրքական բանակը զինված ուժեր էր տեղափոխում Ալ-Զաբի շրջան, քրդական ուժերը խոցել են ուղղաթիռը:
Միևնույն ժամանակ Թուրքիայի պաշտպանության նախարարությունը հաղորդագրություն է տարածել, որ այսօր Իրաքի հյուսիսում թուրքական ռազմական ուղղաթիռը արտակարգ վայրէջք է կատարել և վթարի ենթարկվել:
Հաղորդվում է, որ ուղղաթիռը վայէրջք է կատարել տեխնիկական խնդիրների պատճառով: Անձնակազմի 8 անդամներից 7-ի կյանքին վտանգ չի սպառնում, իսկ մյուսին գտնելու համար որոնողական աշխատանքները շարունակվում են:
Մինչդեռ թուրք օգտատերերը համացանցում ակտիվորեն քննարկում են այս միջադեպը՝ համոզմունք հայտնելով, որ խոսքը նույն ուղղաթիռի մասին է: Նրանց կարծիքով՝ թուրքական իշխանությունները ցանկանում են հասարակությունից թաքցնել այն փաստը, որ իրականում քրդական ուժերն են խոցել թուրքական ուղղաթիռը։
Հետևեք մեզ տելեգրամում
