Պաշտոնական Մոսկվան կոչ է անում Թուրքիային զսպվածություն ցուցաբերել: Այս մասին այսօր հայտարարել է Սիրիայում Ռուսաստանի նախագահի հատուկ ներկայացուցիչ Ալեքսանդր Լավրենտևը Աստանայի ձևաչափով 19-րդ հանդիպմանը:
«Կոչ ենք անում թուրք գործընկերներին որոշակի զսպվածություն ցուցաբերել լարվածության հետագա էսկալացիայից խուսափելու համար ոչ միայն հյուսիսային և հյուսիսարևելյան Սիրիայում, այլև ամբողջ երկրում»,- ասել է Լավրենտևը հանդիպման սկզբում:
Հատուկ ներկայացուցիչն ընդգծել է, որ բոլոր ներգրավված կողմերի հետ աշխատելիս պետք է ջանքեր գործադրել քրդական հարցին խաղաղ լուծում գտնելու համար։
Լավրենտևը նաև հավելել է, որ Թուրքիան նախօրոք Ռուսաստանին չի տեղեկացրել Սիրիայում և Իրաքում օդային ռազմական գործողության մասին: Նա դարձյալ կոչ է արել Թուրքիային զերծ մնալ Սիրիայի տարածքում ավելորդ ուժ կիրառելուց:
Հիշեցնենք, որ թուրքական զինված ուժերը օդային ռազմական գործողություն են իրականացրել Սիրիայի հյուսիսում: Թուրքական ԶԼՄ-ները գրում են, որ օդային գործողությունը կարող է վերածվել ցամաքայինի:
Հետևեք մեզ տելեգրամում
