Մենք պատրաստ ենք ոչ միայն խորացնել Եգիպպոսի հետ առկա համագործակցությունը, այլև ընդլայնել դրա ոլորտները: Այս մասին ասել է Հայաստանի Հանրապետության նախագահ Վահագն Խաչատուրյանը՝ եգիպտական «AlQahera News» լրատվական ալիքին տված հարցազրույցում:
Region Monitor-ը ստորև ներկայացնում է հատվածներ հարցազրույցից.
AlQahera News – Որո՞նք են Եգիպտոսի և Հայաստանի համագործակցության ասպեկտները։
Հայաստանի և Եգիպտոսի միջև հարաբերություններում առկա են լավագույն ավանդույթներն ու զարգացման մեծ ներուժը, ուստի այս առումով, մենք, անշուշտ, պատրաստ ենք ոչ միայն խորացնել առկա համագործակցությունը, այլև ընդլայնել դրա ոլորտները։
Այս տարի մենք նշեցինք մեր երկու երկրների միջև դիվանագիտական հարաբերությունների հաստատման 30-ամյակը, որը կարևոր ուղենիշ է, և վստահ եմ, որ այն նոր լիցք կհաղորդի երկկողմ հարաբերությունների հետագա ընդլայնմանը։
Չնայած վերջին տարիների մարտահրավերներին (COVID-19, Ադրբեջանի ագրեսիան Արցախի և Հայաստանի դեմ և իրավիճակը Ուկրաինայում), հայ-եգիպտական հարաբերությունները շարունակել են զարգանալ ու խորանալ, և կարող են ամրապնդվել։
Մենք նաև բարձր մակարդակի քաղաքական երկխոսություն ենք վարել երկու երկրների միջև: Առաջիկա տարեսկզբին Եգիպտոսից ակնկալում ենք բարձր մակարդակի այցեր: Հայ-եգիպտական համագործակցության ուղղություններից մեկը կարող է լինել կլիմայի փոփոխության մարտահրավերների դեմ համատեղ պայքարը։
AlQahera News – Ի՞նչ կասեք է տնտեսական հարաբերությունների մասին:
Տնտեսական հարաբերություններում առաջընթաց կա, այս տարին շատ խոստումնալից էր, քանի որ առաջին ութ ամիսների ընթացքում առևտրաշրջանառության ծավալն ավելացել է մոտ հինգ անգամ 2021 թվականի նույն ժամանակահատվածի համեմատ, իսկ տարեվերջին ավելի բարձր արդյունքներ ենք ակնկալում։
Զբոսաշրջությունը դրա լավագույն ապացույցն է, քանի որ Եգիպտոսը դարձել է մեր քաղաքացիների սիրելի վայրերից մեկը, իսկ վիզաների դյուրացումը և պարզեցումը նոր խթան կհաղորդեն երկու երկրների միջև զբոսաշրջության աշխուժացմանը։
Հետևեք մեզ տելեգրամում
