Սիրիայում ՌԴ նախագահի հատուկ ներկայացուցիչ Ալեքսանդր Լավրենտևը հայտարարել է, որ Անկարայի և Դամասկոսի միջև մերձեցման առնչությամբ ոչ թե ժամանակի խնդիր կա, այլ ցանկության:
Al Arabiya-ին տված հարցազրույցում Լավրենտևը նշել է, որ գաղտնիք չէ՝ երկու երկրների միջև անվտանգության ծառայությունները շարունակում են շփումները, և այս ամենը նպաստում է որոշ խնդիրների լուծմանը:
Ինչ վերաբերում է Սիրիայի և Թուրքիայի միջև շփումները ավելի բարձր մակարդակի բարձրացնելուն, հատուկ ներկայացուցիչն ընդգծել է, որ կարելի է անդրադառնալ Թուրքիայի արտգործնախարար Մևլութ Չավուշօղլուի այն խոսքերին, թե «դրա ժամանակը չի եկել»։
«Բայց մենք ասում ենք, որ ժամանակի խնդիր չի, այլ ցանկության… ցանկություն ընդառաջ գալու միմյանց: Իսկ նման միտումներ զգում ենք Թուրքիայի նախագահ Ռեջեփ Թայիփ Էրդողանի կողմից, ով ենթադրել և ակնկալել է, որ Սիրիան և Թուրքիան պետք է աշխատեն երկկողմ հարաբերությունների կարգավորման ուղղությամբ»,- հավելել է Լավրենտևը:
Լավրենտևի խոսքերով՝ թուրք-սիրիական հարաբերությունների կարգավորմանը խանգարում են սուվերեն երկրի տարածքում Թուրքիայի ներկայությունը և նրա ցուցաբերած համակողմանի աջակցությունը սիրիական ընդդիմությանը:
Խոսելով Սիրիայի և Թուրքիայի նախագահների՝ Ռուսաստանում կայանալիք հանդիպման հնարավորության մասին՝ հատուկ ներկայացուցիչը նշել է, որ դա միշտ էլ հնարավոր է, իսկ նա աջակցում է նման հանդիպումների կազմակերպման հնարավորությանը:
«Կրկնում եմ՝ Թուրքիան պետք է հաշվի առնի սա, սակայն մենք հավատում ենք, որ նման հանդիպումը դրական կլինի և ընդհանուր առմամբ աշխատում ենք այդ ուղղությամբ»,- հաստատել է Լավրենտևը:
Հետևեք մեզ տելեգրամում
