Սիրիայի նախագահ Բաշար-Ալ Ասադի և Թուրքիայի նախագահ Ռեջեփ Թայիփ Էրդողանի միջև հնարավոր հանդիպման վերաբերյալ ռուսական վերջին հայտարարությունների առնչությամբ արձագանքները շարունակվում են:
Դիվանագիտական աղբյուրը Al Arabiya-ին անանուն մնալու պայմանով որոշակի մանրամասներ է հայտնել վերջին զարգացումների մասին: Մասնավորապես աղբյուրը պնդել է, որ Մոսկվան ձգտում է հանդիպումն անցկացնել «հաշտեցման» քողի ներքո, որպեսզի խուսափի Սիրիայի հյուսիսում Թուրքիայի լայնածավալ ռազմական գործողությունից: Հաղորդվում է, որ հնարավոր ռազմական գործողությունը լուրջ սպառնալիք է տարածաշրջանային և միջազգային անվտագության համար:
Դիվանագիտական աղբյուրը հավելել է, որ Դամասկոսի և Մոսկվայի միջև հարաբերություններն առավել ակտիվացել են ավելի քան մեկ ամիս առաջ՝ ՌԴ-ում Սիրիայի նոր դեսպան, փոխարտգործնախարար Բաշար Ալ-Ջաֆարիի նշանակումով:
Նորությունն այն է, որ աղբյուրը ակնարկել է այս գործընթացում Իրանի թաքնված դերը: Ըստ աղբյուրի՝ իրանական կողմն Ասադին մղում է դիմակայել ռուսական ճնշմանը՝ բացատրելով, որ Թեհրանը դեմ չէ հանդիպմանը: Սակայն Թեհրանին անհանգստացնում է Ասադի և Էրդողանի միջև համաձայնություն հասնելու հարցում Մոսկվայի հաջողությունը, ինչը բացասաբար կանդրադառնա Սիրիայում Իրանի շահերի վրա:
Համաձայն աղբյուրի՝ Թեհրանին մտահոգում է Ռուսաստանի, Թուրքիայի և Սիրիաի միջև որոշակի համաձայնագրերի կամ փոխըմբռնումների կնքումը, որոնք հակասում են իր շահերին։
Հիշեցնենք, որ նախորդ շաբաթվա վերջին ռուսական կողմից հայտարարություններ են արվել առ այն, որ Ասադ-Էրդողան հանդիպումը ոչ թե ժամանակի հարց է, այլ ցանկության, իսկ ռուսական կողմը պատրաստ է միջնորդություն իրականացնել անհրաժեշտության դեպքում:
Հետևեք մեզ տելեգրամում
