Ադրբեջան-Հայաստան հակամարտության և Բաքվի ագրեսիվ վարքը սահմանափակելու տեսանկյունից Հայաստանում ԵՄ քաղաքացիական առաքելություն հիմնումը կարևոր գործոն է: Նման տեսակետ է հայտնել տարածաշրջանային հարցերով փորձագետ Արմեն Պետրոսյանը:
Պետրոսյանը հիշեցրել է, որ ԵՄ-ի նման որոշումը կայացվել է Բրյուսելի և Երևանի շահերի համադրման արդյունքում՝ հավելելով, որ այս քայլը նաև 2022 թ. հոկտեմբերին Պրահայում տեղի ունեցած քառակողմ հանդիպման արդյունքների ամրապնդումն է։ Այն ապահովում է հարավկովկասյան տարածաշրջանում ԵՄ քաղաքական ազդեցության աճը և նոր որակի ներգրավվածությունն ու դերակատարումը։
Փորձագետը նշել է, որ աշխարհաքաղաքական ներկայիս պայմաններում ԵՄ-ի քաղաքական ազդեցության աճը որոշակի առումով նաև խնդրահարույց է՝ նկատի ունենալով Բրյուսելի մրցակից տարածաշրջանային դերակատարների ներկայությունը:
Այս համատեքստում Պետրոսյանն ընդգծել է, որ Բրյուսելի հավակնությունները զսպելուն պատրաստ առաջնային խաղացողը Մոսկվան է, իսկ նրա հակազդեցության գործիքակազմը բազմաշերտ է։ Որպես ասվածի վառ ապացույց փորձագետը հիշեցրել է ՌԴ ԱԳՆ հայտարարությունը:
Փորձագետը երկրորդ խնդրահարույց գործոն է դիտարկել Ադրբեջանի դիրքորոշումը:
«Եթե Պրահայի առաջին հանդիպման ժամանակ ԵՄ առաքելության գործուղումը փոխհամաձայնեցված էր նաև Ադրբեջանի հետ, ապա այս դեպքում, ինչպես տեսնում ենք՝ այդ առաքելության գործարկումը պայմանավորված է ԵՄ-Հայաստան առանձին փոխհամաձայնությամբ»,- նկատել է Պետրոսյանը:
Նրա խոսքով՝ առաքելությունը որոշակիորեն նպաստելու է Հայաստանի դեմ ադրբեջանական սադրանքների նվազեցմանը։ ԵՄ տեսանկյունից սա հավելյալ բաղադրիչ է Բաքվից էներգետիկ կախվածությունը զսպելու համատեքստում:
Պետրոսյանը հավելել է, որ ԵՄ առաքելության գործարկումը կարող է որոշակի առումով խնդիրներ առաջացնել նաև Իրանի դիրքորոշման տեսանկյունից: Փորձագետն ուշադրություն է հրավիրել վերջին շրջանում Թեհրան-Բրյուսել հարաբերություններում արձանագրվող լարվածության վրա՝ պայմանավորված Իրանի դեմ ԵՄ-ի պատժամիջոցների չորրորդ փաթեթի կիրառմամբ։
Ամփոփելով՝ փորձագետը շեշտել է, որ նշված տարածաշրջանային բանաձևումներում հնարավոր նոր մարտահրավերներից խուսափելու համար զգալի պատասխանատվություն է կրում նաև Հայաստանը:
Հետևեք մեզ տելեգրամում
