Փետրվարի 27-ի Սիրիայի կառավարական բանակի ավիացիայի հարվածների հետևանքով Իդլիբում 33 թուրք զինծառայողների զոհվելու մասին տեղեկությունից հետո մամուլում լուրեր են տարածվել, որ Թուրքիան բացում է Եվրոպայի հետ սահմանը սիրիացի փախստականների համար:
Իդլիբի դեպքերի վերաբերյալ CNN Turk հեռուստաալիքին հարցազրույց տված Թուրքիայի իշխող «Արդարություն և զարգացում» կուսակցության (AKP-ԱԶԿ) խոսնակ Օմեր Չելիքը պատասխանել է նաև սիրիացի փախստականների համար սահմանը բացելու հարցին:
Չելիքը մասնավորապես ասել է. «Մենք ասել էինք, որ Թուրքիան չի կարողանալու իր վրա վերցնել փախստականների նոր ալիք, ասել էինք, որ Թուրքիան իր բոլոր հնարավորություններն արդեն սպառել է: Այդ պատճառով արդեն Թուրքիան չի կարողանում դիմակայել ստեղծված ճնշմանը: Տեղի ունեցած հարձակումների հետևանքով մի կողմից Թուրքիայի ներսի փախստականներն են շարժվում դեպի դեպի Եվրոպա, մյուս կողմից էլ Սիրիայի տարածքից են դեպի Թուրքիա շարժվում: Փախստականների մասով մեր քաղաքականությունը նույնն է, սակայն իրավիճակն այնպիսինն է, որ արդեն ի վիճակի չենք փախստականներին պահել»:
Նշենք, որ թուրքական էլեկտրոնային մամուլում մի շարք հրապարակումներ ու լուսանկարներ են հայտնվել առ այն, որ Թուրքիայում գտնվող բազմաթիվ սիրիացի փախստականներ այս գիշերվանից սկսած շարժվում են դեպի Էդիրնե՝ Եվրոպայի հետ Թուրքիայի սահման:
Հետևեք մեզ տելեգրամում
