Իրանի ԱԳՆ խոսնակ Նասեր Քանանին հերքել է կեղծ մեղադրանքներով ձերբակալված Ադրբեջանի քաղաքացիների պաշտոնական կամ ոչ պաշտոնական շփումները իրանական կառույցների հետ։
«Ցավոք, Ադրբեջանի կառավարությունը երկար ժամանակ է, ինչ կեղծ մեղադրանքներով ձերբակալում և կալանավորում է իր քաղաքացիներին՝ պնդելով, որ նրանք կապ ունեն իրանական կառույցների հետ»,- Քանանիի խոսքերը մեջբերել է ISNA լրատվամիջոցը։
Մատնանշելով երկու երկրների ժողովուրդների միջև պատմական, կրոնական և մշակութային կապերը՝ Քանանին նշել է, որ Ադրբեջանի կառավարությունը չպետք է վտանգի իր քաղաքացիների այս խորը պատմական կապերը և դա վերագրի հարևաններին։
«Օրինազանց քաղաքացիներին ձերբակալելը բոլոր պետությունների բնական իրավունքն է, սակայն Իրանի հետ կապեր ունենալու մեղադրանքով սեփական քաղաքացիներին ձերբակալելը չլսված և անընդունելի է»,-հավելել է Քանանին։
Հետևեք մեզ տելեգրամում
