Թուրքիայի նախագահ Ռեջեփ Թայիփ Էրդողանի վերջին հայտարարությունները Հայաստան-Ադրբեջան գործընթացի վերաբերյալ վկայում է, որ Անկարայի քաղաքականությունը ՀՀ-ի նկատմամբ չի փոխվել։
Այս մասին Region Monitor-ի հետ զրույցում ասաց թուրքագետ և ակադեմիկոս Ռուբեն Սաֆրաստյանը։
Թուրքագետի կարծիքով, Հայաստանի 3-րդ հանրապետությունը տարածաշրջանում մշտապես հետապնդել է խաղաղասիրական նպատակներ և պատրաստ է եղել առանց նախապայմանների դիվանագիտական հարարաբերություններ հաստատել Թուրքիայի հետ։
«Նախապայմանները Անկարայի կողմից են եղել։ Հենց Թուրքիայի կողմից առաջ քաշած պայմանների պատճառով մինչ օրս Թուրքիայի հետ հարաբերությունները կարգավորված չեն։ Մյուս կողմից Թուրքիան, ըստ էության, սառեցրել է Հայաստանի հետ հարաբերությունների կարգավորման գործընթացը՝ կապելով դրանք Հայաստանի ու Ադրբեջանի միջև կնքվելիք խաղաղության պայմանագրի հետ՝ հիմնվելով Ադրբեջանի մաքսիմալիստական պահանջների վրա»,-նշեց Ռուբեն Սաֆրաստյանը։
Թուրքագետը նաև շեշտեց, որ Թուրքիան ամենաբարձր մակարդակով պահանջներ է ներկայացնում այսպես կոչված Զանգեզուրի միջանցքի հետ կապված՝ պնդելով, որ այն գործարկվի կասկածի տակ դնելով ՀՀ սուվերենություն։
«Կարծում եմ՝ ՀՀ-ի նկատմամբ Թուրքիայի 30-ամյա քաղաքականության մեջ որևէ փոփոխություն տեղի չի ունեցել։ Անկարան նորից առաջ է քաշում նախապայմաններ, բայց այս անգամ ավելացնելով դրանց թիվը։ Իհարկե, մենք հույս ունենք, որ Թուրքիան կսկսի կառուցողական քաղաքականություն իրականացնել ՀՀ-ի հետ հարաբերությունների կարգավորման հարցում, բայց, հաշվի առնելով անցյալի փորձը, մեծ հույսեր չկան»,-նշեց Սաֆրաստյանը;
Նշենք, որ ավելի վաղ Թուրքիայի նախագահ Ռեջեփ Թայիփ Էրդողանը կառավարության նիստի ավարտից հետո մամուլի ասուլիսի ժամանակ անդրադարձել է Հայաստան-Ադրբեջան գործընթացին, նշելով.
«Բազմիցս նշել ենք, որ ոչ մի դեպքում չպետք է բաց թողնել Հարավային Կովկասում ձեռքբերված պատմական հնարավորությունը։ Մեր ադրբեջանցի եղբայրները բազմիցս ցույց են տվել, որ խաղաղություն ցանկացող կողմն են։ Նույն դիրքորոշումը ակնկալում ենք Հայաստանի ղեկավարությունից։ Թուրքիան մնայուն խաղաղության հասնելու համար ամեն տեսակ ջանք գործադրելու է»։
Հավելենք, որ հայ-թուրքական հարաբերությունների կարգավորման ներկայիս գործընթացը մեկնարկել է 2021թ. վերջին։ Երկու երկրների հարաբերությունները կարգավորելու նպատակով Հայաստանի և Թուրքիայի նշանակած հատուկ ներկայացուցիչները հանդիպել են 4 անգամ, համապատասխանաբար՝ 2022թ. հունվարի 14-ին, փետրվարի 24-ին, մայիսի 3-ին և հուլիսի 1-ին։ Հանդիպումների ընթացքում ձեռք են բերվել պայմանավորվածություններ, որոնց կյանքի կոչումը Թուրքիան հետագայում պայնավորել է հայ-ադրբեջանական գործընթացով։
Հարցազրույցը՝ Էդուարդ Մելքումյանի
Հետևեք մեզ տելեգրամում
