Ադրբեջանում բռնաճնշումներն իշխանության և քաղաքացիական հասարակության քննադատների նկատմամբ շարունակվում են: Այս մասին հայտարարել է ԵԽԽՎ-ում Գերմանիայի պատվիրակության ղեկավար Ֆրանկ Շվաբեն։
Շվաբեի խոսքով՝ Եվրախորհրդի անդամ երկրի համար այս ամենը բացարձակապես անընդունելի է։
«Այս մասին մենք շատ ենք խոսել հանձնաժողովի նիստերում, և վիճակը սարսափելի է։ Բավական է հիշել Բաքվի՝ Խոշտանգումների դեմ կոմիտեի առաքելությանը երկիր թույլ տալու մերժումը: Բացարձակապես անընդունելի է, որ ԵԽԽՎ անդամ երկրում խոշտանգումներ են տեղի ունենում»,- ասել է պատգամավորը։
Ըստ պատգամավորի՝ ԵԽԽՎ-ում ադրբեջանական պատվիրակությանը ձայնի իրավունքից զրկելու որոշումից հետո Ադրբեջանում իրավիճակն էլ ավելի է սրվել։
«Բաքուն պերսոնա նոն գրատա է հայտարարել ԵԽԽՎ 76 պատգամավորների, և ի՞նչ երկխոսության մասին կարող է խոսք լինել։ Միաժամանակ երկրում աճում է քաղբանտարկյալների թիվը։ Թվում է, թե COP29-ի նախօրեին դրական փոփոխություններ կլինեն, բայց մենք հակառակն ենք տեսնում»,- եզրափակել է Շվաբեն։
Իր հերթին Ադրբեջանի հարցով ԵԽԽՎ զեկուցող Լիզ Քրիստոֆերսենը կարծում է, որ Եվրախորհուրդ վերադառնալու համար Ադրբեջանը պետք է փոխի իր վերաբերմունքն այս կազմակերպության նկատմամբ և համագործակցի Եվրոպայի խորհրդի ինստիտուտների հետ
«Այն, ինչ կատարվում է Ադրբեջանում, տագնապալի է, և ԵԽԽՎ-ն պետք է հստակ ազդակ ուղարկի պաշտոնական Բաքվին, որ այդ բացասական երևույթները պետք է դադարեցվեն»,- պնդել է Քրիստոֆերսենը։
Հետևեք մեզ տելեգրամում
