ՀՀ ԱԳ նախարարի տեղակալ Վահան Կոստանյանը նոյեմբերի 7-ին Կառավարության նիստից հետո լրագրողների հետ զրույցում նշել է, որ Հայաստանն ու Ադրբեջանը երկար ժամանակ է, ինչ առանց միջնորդների են խորհրդակցություններ անցկացնում։
«Հայաստանի և Ադրբեջանի միջև հարաբերությունների կարգավորմանն ուղղված բանակցությունները երկար ժամանակ է, ինչ շարունակվում են երկկողմ ձևաչափով։ Բնականաբար, հանդիպումներ են եղել տարբեր երկրներում, մեր գործընկերները փորձել են իրենց աջակցությունը հայտնել բանակցային գործընթացին, սակայն բանակցությունները, ըստ էության, տեղի են ունենում երկկողմ ձևաչափով»,-ասել է Կոստանյանը։
Խոսելով խաղաղության պայմանագրի մասին՝ փոխարտգործնախարարն ասել է, որ այս պահին խաղաղության պայմանագրի բոլոր դրույթների վերաբերյալ վերջնական համաձայնեցում չկա։
«Այս պահին որևէ կոնկրետ պայմանավորվածություն չկա նախարարների կամ երկրների ղեկավարների մակարդակով հանդիպման վերաբերյալ, բայց հայկական կողմը շահագրգռված է հանդիպումներն ինտենսիվացնելու հարցում, որպեսզի հնարավորինս կարճ ժամկետում ավարտվի համաձայնագրի տեքստի հաաձայնեցումը։ ՀՀ Սահմանադրության հարցը չի հանդիսանում խաղաղության պայմանագրի մաս»,-հավելել է Կոստանյանը։
Հետևեք մեզ տելեգրամում
