Ֆրանսիայում Իսրայելի դեսպանին կկանչեն ԱԳՆ

Ֆրանսիայում Իսրայելի դեսպան Յաել Հերմանն առաջիկա օրերին կկանչվի Ֆրանսիայի ԱԳՆ։ Պատճառն այն է, որ Իսրայելի ոստիկանությունը նախքան Ֆրանսիայի  արտգործնախարար Ժան-Նոել Բարրոյի՝ Երուսաղեմի ֆրանսիական Պատեր Նոստեր եկեղեցի մտնելը ներխուժել էր տարածք, ինչպես նաև կարճ ժամանակով բերման էր ենթարկել ֆրանսիացի ժանդարմներին։ Արտգործնախարարն այս իրավիճակն անընդունելի է համարել և հրաժարվել եկեղեցի գնալ։

Սա առաջին դեպքը չէ, որ միջադեպ է տեղի ունենում Իսրայելի ոստիկանության և Ֆրանսիայի բարձրաստիճան պաշտոնյաների՝ Իսրայել կատարած այցերի ժամանակ։ 1996 թվականին Ֆրանսիայի նախագահ Ժակ Շիրակը զայրացել է, որ Ֆրանսիայի տիրապետության տակ գտնվող Սուրբ Աննա եկեղեցի այցելելիս իսրայելցի զինվորականները թույլ չեն տվել այնտեղ հավաքված մարդկանց մոտենալ Շիրակին և սեղմել նրա ձեռքը։ Շիրակը սպառնացել ինքնաթիռ նստել և լքել երկիրը։ Նմանատիպ դրվագը տեղի է ունեցել նաև 2020 թվականին՝ Ֆրանսիայի ներկայիս նախագահ Էմանուել Մակրոնի այցի ժամանակ։ Մակրոնին դուր չի եկել, որ իսրայելցի ոստիկանները պատրաստվում էին իր հետ մտնել Սուրբ Աննա եկեղեցի, որը վերահսկվում է Ֆրանսիայի կառավարության կողմից։ Մակրոնը կոշտ տոնով նրանց դուրս է հրավիրել։