Պաղեստինյան «ՀԱՄԱՍ» շարժումը և «ՖԱԹՀ» կուսակցությունը, որն առաջատար դեր է խաղում Հորդանան գետի արևմտյան ափում, համատեղ ծրագիր են մշակում Գազայի հատվածի հետպատերազմական վերականգնման համար։ Այս մասին հայտնում է The Wall Street Journal-ը՝ վկայակոչելով պաղեստինցի և արաբ պաշտոնյաների շրջանում ունեցած աղբյուրներին։
Թերթի զրուցակիցների խոսքով, ծրագրի հիմնական կետը կողմերից ոչ մեկի հետ չառնչվող «պաղեստինյան տեխնոկրատների կոմիտեի» ստեղծումն է։ Կոմիտեի հիմնական խնդիրը լինելու է ռազմական գործողությունների ավարտից հետո կառավարել անկլավի «օգնության բաշխումն ու վերականգնումը»։
Պարբերականը նշում է, որ այս հարցում «ՀԱՄԱՍ»-ի և «ՖԱԹՀ»-ի կոնսենսուսի ձեռքբերումը նպաստում է ԱՄՆ-ի և Իսրայելի կողմից քննարկվող ծրագրի իրականացմանը, ըստ որի՝ Գազայում մինչև ընտրությունները պետք է ստեղծվի «ժամանակավոր տեխնոկրատական կառավարություն»։
Սակայն, ինչպես գրում է WSJ-ը, «ՀԱՄԱՍ»-«ՖԱԹՀ» ծրագրի իրականացումը կախված է հրադադարի գործարքի հաջողությունից, որի շուրջ Իսրայելն ու ՀԱՄԱՍ»-ը մեկ տարուց ավելի չեն կարողանում պայմանավորվել։ Անհասկանալի է նաև, թե արդյոք հրեական պետությունը կաջակցի Գազայում նման կոմիտեի ստեղծմանը:
Նշենք, որ «ՀԱՄԱՍ»ի և «ՖԱԹՀ»-ի միջև բանակցությունների նոր փուլը կայացել է նոյեմբերի 2-ից 4-ը Կահիրեում։
Հետևեք մեզ տելեգրամում
