«Միջազգային քրիստոնեական համերաշխություն» կազմակերպությունը (CSI), Եկեղեցիների Համաշխարհային Խորհուրդը, Համաշխարհային Ավետարանչական դաշինքը 22 այլ կազմակերպությունների հետ համատեղ հայտարարություն են տարածել կապված Բաքվում անցկացվող COP29-ի և Լեռնային Ղարաբաղում էթնիկ զտումների վերաբերյալ։
Հայտարարության մեջ նշված է, որ COP29-ն օգտագործվում է որպես Լեռնային Ղարաբաղում (Արցախում) էթնիկ զտումները քողարկող միջոց։
«Մենք մեր համերաշխությունն ենք հայտնում Լեռնային Ղարաբաղի տեղահանված հայերին։ Մենք ափսոսում ենք ՄԱԿ-ի Կլիմայի փոփոխության կոնֆերանսի օգտագործումը մարդկության դեմ հանցագործությունները լուսաբանելու համար, որոնք հանգեցրել են նրանց տեղահանմանը:
Մենք կոչ ենք անում Ադրբեջանի կառավարությանը կատարել Խաղաղության COP-ի (COP of Peace) տեսլականը՝ անվերապահորեն և անհապաղ ազատ արձակելով բոլոր հայ պատանդներին և ադրբեջանցի քաղբանտարկյալներին։
Մենք նաև կոչ ենք անում Ադրբեջանին նպաստել տարածաշրջանում կայուն խաղաղության հաստատմանը` նպաստելով Լեռնային Ղարաբաղի էթնիկ հայ բնակչության՝ իրենց հայրենիք անվտանգ վերադարձին:
Մենք նաև կոչ ենք անում COP29-ին մասնակցող բոլոր պետություններին այդ հարցերն ուղղակիորեն ուղղել Ադրբեջանի կառավարությանը»,-ասված է հայտարարության մեջ։
Կազմակերպությունները նաև մատնանշել են Ադրբեջանի կողմից Լեռնային Ղարաբաղում քրիստոնեական վայրերի ոչնչացումը՝ ներառյալ եկեղեցիների, գերեզմանների և ամբողջական գյուղերի, ինչը Ադրբեջանի ագրեսիայի հետևանքով սպառնալիք է տարածաշրջանում կրոնական ազատությանը և բազմակարծությանը։
Հետևեք մեզ տելեգրամում
