Վրաստանի ընդդիմության առաջնորդներն ու կողմնակիցները նոյեմբերի 24-ի երեկոյան ժամերից հավաքվել են Թբիլիսիի Ռուսթավելի պողոտայում գտնվող խորհրդարանի շենքի մոտ, որպեսզի իշխող «Վրացական երազանք» կուսակցության նորընտիր պատգամավորներին անձամբ արտահայտեն իրենց դժգոհությունը՝ կապված խորհրդարանական ընտրությունների հետ։
Խորհրդարանի շենքի մոտ ոստիկաններ են մոբիլիզացվել, իրավապահներն փակել են դեպի օրենսդիր մարմին տանող ճանապարհները, տարածք են բերվել ջրցան մեքենաներ։ Գիշերը խորհրդարանի մոտ մի քանի միջադեպ է տեղի ունեցել՝ բախումներ և լեզվակռիվ ընդդիմադիր կուսակցությունների առաջնորդների ու ոստիկանության միջև։
Խորհրդարան անցած ընդդիմադիր բոլոր չորս ուժերի առաջնորդները հրաժարվում են աշխատել 11-րդ գումարման օրենսդիր մարմնում՝ պնդելով, որ հոկտեմբերի 26-ի ընտրություններում տեղի է ունեցել տոտալ կեղծիք։ Նրանք պահանջում են չեղյալ համարել ընտրությունների արդյունքները, միջազգային հետաքննություն անցկացնել այս հարցով, որից հետո՝ նոր ընտրություններ։
Վրաստանի նորընտիր խորհրդարանն իր աշխատանքը կսկսի 12։00-ին Թբիլիսիի ժամանակով։ Լրագրողներն արդեն կարողացել են մտնել խորհրդարանի շենք։ Նրանց խոսքով, խորհրդարանի ղեկավարն ու իշխող կուսակցությունից որոշ պատգամավորներ արդեն տեղում են։ Դեռ պարզ չէ, թե արդյոք գործող խորհրդարանի ընդդիմադիր պատգամավորները նախատեսում են մտնել խորհրդարան։ 11-րդ գումարման խորհրդարանի լիազորությունները ճանաչելուց հետո նորընտիր ընդդիմադիրները մտադիր են հրաժարվել իրենց մանդատներից։
Հետևեք մեզ տելեգրամում
