Ֆրանսիայի նախագահ Էմանուել Մակրոնը համաձայնել է չկատարել Իսրայելի վարչապետ Բենյամին Նեթանյահուի նկատմամբ Միջազգային քրեական դատարանի (ICC) կալանավորման հրամանը՝ Լիբանանում հրադադարի համաձայնագրում դեր ունենալու դիմաց։ Այս մասին հայտնում է ֆրանսիական Le Point ամսագիրը՝ հղում անելով Ֆրանսիայի առաջնորդին մոտ կանգնած աղբյուրին։
Հրապարակման համաձայն՝ հրամանի տրվելուց անմիջապես հետո Ֆրանսիայի նախագահը զանգահարել է Նեթանյահուին և հայտարարել, որ Փարիզը «պարտավոր է հարգել ՄՔԴ-ն և լիովին համագործակցել»։ Միևնույն ժամանակ, Մակրոնը հավելել է, որ ՄՔԴ-ի դրույթները որոշ դեպքերում «նախատեսում են անձեռնմխելիություն»։
Այդ կապակցությամբ կողմերը քննարկել են Լիբանանում հրադադարի շուրջ ստեղծված իրավիճակը։ Նրանք համաձայնվել են, որ Փարիզը «կարևոր դեր կունենա ՄԱԿ-ի Անվտանգության խորհրդի 1701 բանաձևի կատարման մոնիտորինգի հանձնաժողովում, որը կարգավորում է իրավիճակը Իսրայել-Լիբանան սահմանին»: Հենց այս հեռախոսազրույցի ընթացքում էլ լուծվել են Ֆրանսիայի և Իսրայելի «վերջին տարաձայնությունները», շեշտում է պարբերականը։
Հետևեք մեզ տելեգրամում
