Ադրբեջանի նախագահ Իլհամ Ալիևը հայտնել է, թե Հայաստանն ու Ադրբեջանը ինչ հարցերի շուրջ դեռևս համաձայնության չեն եկել խաղաղության պայմանագրի նախագծում։
«Արմենպրես»-ի փոխանցմամբ՝ ռուսական «Ռիա Նովոստի» գործակալությանը տված հարցազրույցում Ադրբեջանի նախագահը նշել է, որ կողմերը խաղաղության պայմանագրի նախագծի երկու հոդված դեռ չեն համաձայնեցրել՝ միմյանց դեմ միջազգային հայցեր ներկայացնելուց զերծ մնալու և սահմանին երրորդ երկրների ներկայության վերաբերյալ։
«Խաղաղության պայմանագրի առումով մենք իրականում մեծ առաջընթաց ենք գրանցել։ Փաստաթղթի 17 հոդվածներից 15-ը համաձայնեցված են, մնացել են 2-ը։ Դրանցից մեկը վերաբերվում է միմյանց դեմ միջազգային հայցեր ներկայացնելուց զերծ մնալուն, մյուսը՝ մեր սահմանին այլ երկրների ներկայացուցիչների չտեղակայելուն»,- ասել է Ալիևը։
Հայաստանի արտաքին գործերի նախարար Արարատ Միրզոյանը վերջերս ֆիննական լրատվամիջոցներին տված հարցազրույցում ևս հայտարարել էր, որ Հայաստանի և Ադրբեջանի միջև խաղաղության պայմանագրի նախագծի 17 հոդվածներից 15-ը համաձայնեցված են։
Հայաստանի վարչապետ Նիկոլ Փաշինյանը Հանրային հեռուստաընկերությանը տված հարցազրույցում, անդրադառնալով Ադրբեջանի պնդմանը, որ Եվրամիության քաղաքացիական դիտորդական առաքելությունը պետք է հեռանա Հայաստանից, հայտարարել էր, որ Հայաստանն Ադրբեջանին առաջարկել է այդ կարգավորումն անել սահմանազատված հատվածների նկատմամբ, որովհետև այն սահմանը, որը սահմանազատված է, այդտեղ օբյեկտիվորեն դիտորդ ունենալու կարիք չկա: Հայաստանի այս առաջարկին Ադրբեջանից արձագանք չի եղել։
Հետևեք մեզ տելեգրամում
