Իրանական ԶԼՄ-ները գրում են, որ դեկտեմբերի 28-ից Թուրքիան իրանական բեռնատարներից յուրաքանչյուր լիտր վառելիքի դիմաց գանձում է 28.064 լիրա (՜29): Թուրքական կողմի որոշման պատճառով իրանցի շատ վարորդներ հրաժարվել են երթևեկել և իրանաթուրքական սահմանին հերթեր են գոյացել: Իրանական ԶԼՄ-ների հաղորդմամբ, ի պատասխան, իրանական կողմն էլ շաբաթ օրվանից դադարեցրել է թուրքական բեռնատարներին դիզվառելիքի տրամադրումը, ինչն իր հերթին առաջացրել է թուրք վարորդների դժգոհությունը:
Ըստ մամուլի՝ թուրքական կողմի որոշումը հաջորդել է Իրանում «լիքը բակի» նախագծի ներդրմանը, ինչը ենթադրում է, որ Իրանից դուրս գալիս իրանական ու արտասահմանյան բեռնատարները պետք է կա՛մ բաքը մինչև վերջ լիցքավորեն, կա՛մ համարժեք գումարը վճարեն: Նախագիծն ուղղված է դիզվառելիքի մաքսանենգության կանխմանը: Ըստ իրանական ԶԼՄ-ների, որոշումն առաջացրել է մի շարք վարորդների դժգոհությունը, պատճառ դարձել սահմաններին իրավիճակի լարմանը և չի նպաստել նաև մաքսանենգության կանխարգելմանը:
Իրադրության սրման ֆոնին իրանական կողմն այժմ միջանկյալ որոշում է կայացրել, մասնավորապես՝ Արևմտյան Ատրպատականի ճանապարհային բեռնափոխադրումների վարչության պետը հայտնել է. «Որոշում է կայացվել, որ մինչև Թուրքիայում ամանորյա արձակուրդների ավարտվելն ու բարձր մակարդակով բանակցությունների անցկացումը դեպի Թուրքիա երթևեկող փոխադրամիջոցների համար 800 լիտր, իսկ Թուրքիայի տարածքով տարանցում իրականացնող իրանական փոխադրամիջոցների համար 1400 լիտր քվոտա սահմանել»: Իրանի առևտրի պալատի տարանցման և բեռնափոխադրումների հանձնաժողովի ղեկավարը, սակայն, այս որոշումն անարդյունավետ է համարում:
Նշենք, որ մինչև թուրքական կողմի որոշումը իրանական բեռնատարները Թուրքիա մուտք գործելիս ազատված էին վառելիքի համար նախատեսված հարկերից և մաքսատուրքերից։
Հետևեք մեզ տելեգրամում
