Լիբանանի նոր վարչապետ Նաուաֆ Սալամը խոստացել է պետական իշխանությունը տարածել երկրի ողջ տարածքում և «լրջորեն իրականացնել ՄԱԿ-ի 1701 բանաձևը», որը կոչ է անում «Հըզբոլլահին» հեռանալ հարավային Լիբանանից:
Սալամը՝ որպես վարչապետ, իր առաջին ելույթում նաև խոստացել է միավորել լիբանանցիներին և աջակցել քաղաքական բոլոր ուժերին, որպեսզի ճգնաժամից տուժած երկիրը «փրկեն, բարեփոխեն և վերականգնեն»։
«Ես բացառման ջատագով չեմ, այլ ավելի շուտ միասնության, և իմ ձեռքերը մեկնում են բոլորին, որպեսզի ոչ մի քաղաքացի իրեն մարգինալացված չզգա»,-ասել է Սալամը Բաաբդայում նախագահ Ջոզեֆ Աունի և խորհրդարանի խոսնակ Նաբիհ Բերիի հետ հանդիպումից հետո:
Վարչապետը նշել է, որ աշխատելու է կառուցել ժամանակակից պետություն և իր առաջնահերթություններից է լինելու երկիրը վերականգնել ավերածություններից և տնտեսական ճգնաժամից։
Նշենք, որ Նաուաֆ Սալամն Արդարադատության միջազգային դատարանի անդամ էր, ով վարչապետ նշանակվելուց հետո վաղաժամ լքեց այդ պաշտոնը։ Նրա թեկնածությունն առաջադրել էին լիբանանցի օրենսդիրներից շատերը։
Հետևեք մեզ տելեգրամում
