Կոբախիձեն առաջարկել է Հարավային Կովկասի երկրների միջև համագործակցության եռակողմ ձևաչափ մշակել

Բաքվում Տնտեսական համագործակցության հարցերով միջկառավարական հանձնաժողովի (IGC) 10-րդ նիստի ժամանակ Վրաստանի վարչապետ Իրակլի Կոբախիձեն հայտարարել է, որ Վրաստանը շահագրգռված է տարածաշրջանում կոնկրետ գործնական քայլեր իրականացնելու և համագործակցության զարգացման մեջ, ինչպես նաև առաջարկել է Հարավային Կովկասի երկրների միջև համագործակցության եռակողմ ձևաչափ մշակել։

Նա նաև նշել է, որ Հարավային Կովկասի երկրների տարածաշրջանային զարգացման և կայուն բարգավաճման առանցքային պայմանը տարածաշրջանում կայունությունն է։

Կոբախիձեն Բաքու էր մեկնել՝ մասնակցելու Տնտեսական համագործակցության հարցերով միջկառավարական հանձնաժողովի 10-րդ նիստին։ X-ի միկրոբլոգում Կոբախիձեն գրել է, որ Վրաստանի և Ադրբեջանի միջև բանակցություններն արդյունավետ են եղել։

«Արդյունավետ բանակցություններ ենք ունեցել Ադրբեջանի վարչապետ Ալի Ասադովի հետ Վրաստանի և Ադրբեջանի Հանրապետության միջև տնտեսական համագործակցության 10-րդ միջկառավարական հանձնաժողովի շրջանակներում։ Քննարկել ենք փոխադարձ հետաքրքրություն ներկայացնող ոլորտներում երկկողմ համագործակցության հետագա խորացման հեռանկարները։ Ընդգծել ենք առևտրատնտեսական, ինչպես նաև էներգետիկ ոլորտում համագործակցության ընդլայնման կարևորությունը։ Մեր ռազմավարական գործընկերությունը վճռորոշ դեր է խաղում տարածաշրջանային կայունության և մեր գործընկերների համար անվտանգ կապի ապահովման համար»,-գրել է Վրաստանի վարչապետը:

Նշենք, որ Բաքվում նախատեսված է նաև Կոբախիձեի հանդիպումը այդ երկրի նախագահ Իլհամ Ալիևի հետ։