Իրանի ԶՈւ ԳՇ հանրային կապերի բաժինը հերթական անգամ վերահաստատել է, որ նախկին նախագահ Էբրահիմ Ռայիսիին տեղափոխող ուղղաթիռը վթարվել է եղանակային և աշխարհագրական բարդ պայմանների պատճառով:
«Տևական ժամանակ է, ինչ համացանցում և տարբեր շրջանակներում ու ամբիոններում Էբրահիմ Ռայիսիի նահատակության վերաբերյալ տարբեր հայտարարություններ են հնչեցնում, որոնք հեռու են իրականությունից և բխում են անտեղյակությունից կամ չարամտորեն են տարածվում: Սա այն դեպքում, երբ ԶՈՒ-ն ԳՇ-ն, որպես այս վթարը քննող պաշտոնական ու օրինական մարմին, 100-ավոր մարդկանց փորձագիտական, տեխնիկակական, դաշտային ուսումնասիրությունների արդյունքում այն եզրահանգմանն է եկել, որ ուղղաթիռի վթարի պատճառը բացառապես տարածաշրջանի բարդ կլիմայական ու աշխարհագրական պայմաններն են եղել և որևէ այլ ենթադրություն, վարկած, այդ թվում՝ տեխնիկական խափանում, դիվերսիա, ահաբեկչություն, պայթյուն, ռադիոէլեկտրոնային ներգործություն և այլն, չեն հաստատվել: Ուստի լրատվամիջոցների ներկայացուցիչներին, ֆիզիկական և իրավաբանական անձանց և խորհրդարանիի հարգելի պատգամավորներին խնդրում ենք զերծ մնալ ոչ պրոֆեսիոնալ, զգացմունքային և ոչ պատասխանատու հայտարարություններ անելուց, որը չի ունենալու այլ արդյունք, քան հասարակական կարծիքը խաթարելը, թշնամիների շահարկումների համար հիմքեր ստեղծելը: Բացարձակապես ձեռնպահ մնացեք այս կապակցությամբ որևէ կասկած հարուցելուց։ Ակնկալվում է, որ դատական համակարգը իրավական միջոցներ կձեռնարկի հասարակության հոգեկան անվտանգությունը խաթարողների դեմ»:
Հիշեցնենք, որ ավելի վաղ Էբրահիմ Ռայիսիի թիկնապահի եղբայրը հայտարարել էր, որ եղբայրն անհանգստանում էր, որ Ռայիսին մեկնելու է Ադրբեջանի սահման: Իսկ մինչև այդ ԻԻՀ խորհրդարանի պատգամավորներից մեկը ծիծաղելի էր որակել ուղղաթիռի վթարի մասին պաշտոնական վարկածը:
Հետևեք մեզ տելեգրամում
