Լիբանանի վարչապետ Նավաֆ Սալամը, ով իր պաշտոնում նշանակվել է հունվարի 13-ին, առաջիկա 48 ժամվա ընթացքում կհրապարակի հանրապետության նոր կառավարության կազմը։
«24 նախարարներից բաղկացած կաբինետը կհամապատասխանի այն քաղաքական փուլին, որում գտնվում է Լիբանանը հունվարի 9-ին գեներալ Ժոզեֆ Աունի նախագահ ընտրվելուց հետո»,-ասել է «Ժողովրդավարական հանդիպում» դաշինքի պատգամավոր Մարվան Համադեհը։
Համադեհն նշել է նախարարների անունները, որոնք կզբաղեցնեն առանցքային պաշտոնները։ Այսպիսով, պաշտոնաթող գեներալներ Ահմեդ ալ-Հաջարն ու Միշել Մունսին կդառնան ՆԳՆ-ի ու ՊՆ-ի ղեկավարները, իսկ նախկին պատգամավոր Յասին Ջաբերը՝ ֆինանսների նախարար։ Ակնկալվում է, որ Նաջի Աբու Ասին կնշանակվի ԱԳՆ ղեկավարի պաշտոնում։
Ինչպես հաղորդում է Asharq al Awsat թերթը, Թարեք Միտրին, ով ներկայացնում է Լիբանանի ուղղափառ համայնքը, կդառնա փոխվարչապետ։
Հունվարի 22-ին վարչապետ Սալամը հայտարարել էր, որ նոր կաբինետին հանձնարարվել է հնարավորինս արագ իրականացնել հրատապ բարեփոխումներ՝ ֆինանսական օգնություն ապահովելու և տնտեսությունը վերականգնելու համար: Նա պարզաբանել է, որ նախորդ կառավարությունները նման էին մինի խորհրդարանների, որոնց ձևավորման համար ամիսներ են պահանջվել: «Ես դեմ եմ քվոտային համակարգին և նախընտրում եմ, որ ազգային գործընկերությունները հիմնված լինեն արդյունավետ կառավարման վրա»,- ընդգծել նա։
Հետևեք մեզ տելեգրամում
