ԱՄՆ պետքարտուղար Մարկո Ռուբիոն մտադիր է փետրվարի կեսերին աշխատանքային շրջագայություն կատարել Մերձավոր Արևելքի երկրներ։ Այս մասին հայտնում է Axios պորտալը՝ վկայակոչելով աղբյուրներին։
Կայքի փոխանցմամբ, պետքարտուղարը կմասնակցի փետրվարի 14-ին մեկնարկող Մյունխենի անվտանգության համաժողովին, որից հետո կմեկնի Մերձավոր Արևելք։
«Իսրայելցի պաշտոնյաները և խնդրին ծանոթ երկու անձինք Axios-ին հայտնել են, որ Ռուբիոն նախատեսում է Մյունխենից մեկնել տարածաշրջան և այցելել Իսրայել, Արաբական Միացյալ Էմիրություններ, Սաուդյան Արաբիա և, հնարավոր է, այլ երկրներ»,-գրել է պարբերականը:
Դեռևս պարզ չէ, արդյոք Ռուբիոն կայցելի Հորդանան գետի Արևմտյան ափ և կհանդիպի Պաղեստինի ինքնավարության ղեկավարների հետ։ Ըստ պաղեստինյան աղբյուրի՝ Պետքարտուղարությունից պաղեստինցի պաշտոնյաներին ասել են, որ Ռուբիոն կայցելի Պաղեստինի ինքնավարություն, եթե գնա Իսրայել։
Հետևեք մեզ տելեգրամում
