Գերմանիայի և Ավստրիայի ներքին գործերի նախարարները դադարեցրել են Սիրիա նախատեսված այցը՝ իրենց պատվիրակություններին սպառնացող հնարավոր վտանգների պատճառով։
Գերմանիայի ներքին գործերի նախարար Նենսի Ֆեյզերը և նրա ավստրիացի գործընկեր Գերհարդ Կառները ծրագրել էին այցելել Դամասկոս: Ըստ նախնական ծրագրի՝ այսօր առավոտյան գերմանական ռազմական ինքնաթիռը պետք է Հորդանանից Ֆեյզերի պատվիրակությունը տեղափոխեր Սիրիա:
Սակայն Գերմանիայի ներքին գործերի նախարարությունը հայտարարել է, որ ուղևորությունը դադարեցվել է դեռևս նախքան չվերթի մեկնարկը Ամման քաղաքից: Ըստ նախարարության հաղորդագրության՝ Գերմանիայի անվտանգության մարմինները կոնկրետ նախազգուշացումներ են ստացել հնարավոր ահաբեկչական սպառնալիքի վերաբերյալ: Գերմանիայի իշխանությունները չեն բացառել պատվիրակության անվտանգության ուղղությամբ առաջացած վտանգները, ինչը դարձել է այցի չեղարկման հիմնական պատճառը:
Ուղևորության մասին նախապես հրապարակային տեղեկություն չէր տարածվել։ Երկու նախարարները նախատեսում էին հանդիպել Սիրիայի ժամանակավոր կառավարության անդամների և ՄԱԿ-ի հումանիտար կազմակերպությունների ներկայացուցիչների հետ:
Հետևեք մեզ տելեգրամում
