Իրանի գերագույն առաջնորդ այաթոլլա Ալի Խամենեին ԱՄՆ-ի հարձակման մտավախության պատճառով երկրի զինված ուժերը կարգադրել է բարձր պատրաստվածության բերել: Այս մասին Reuters գործակալությանը հայտնել է իրանցի բարձրաստիճան պաշտոնյան:
Իրանը նաև ծանուցումներ է ուղարկել հարևան Իրաքին, Քուվեյթին, Կատարին, ԱՄԷ-ին, Թուրքիային և Բահրեյնին, որ ԱՄՆ հարձակմանը ցանկացած աջակցություն, այդ թվում՝ թույլ տալ ԱՄՆ ուժերին օգտագործել իր օդային տարածքը կամ տարածքը, կդիտվի որպես թշնամական գործողություն Թեհրանի նկատմամբ, ինչը «լուրջ հետևանքներ» կունենա։
Իրաքի, Քուվեյթի, Բահրեյնի, Կատարի և ԱՄԷ-ի կառավարությունները չեն պատասխանել Reuters-ի հարցմանը։ Թուրքիայի արտաքին գործերի նախարարությունը հայտարարել է, որ նման ծանուցում չի ստացել, սակայն խոստովանել է, որ այն կարող էր տեղ հասնել այլ ուղիներով։
Իրանցի բարձրաստիճան պաշտոնյան Reuters-ին պարզաբանել է, որ Իրանը կարող է անուղղակի բանակցություններ վարել ԱՄՆ-ի հետ Օմանի միջոցով։
«Անուղղակի բանակցությունները հնարավորություն են տալիս գնահատելու Իրանի հետ քաղաքական կարգավորման հարցում Վաշինգտոնի մտադրությունների լրջությունը»,-պարզաբանել է նա՝ հավելելով, որ թեև ճանապարհը կարող է «քարքարոտ» լինել, բայց նման բանակցությունները կարող են շուտով սկսվել, եթե ԱՄՆ-ն աջակցի դրանց:
Նշենք, որ Իրանը, չնայած հրաժարվել է ԱՄՆ-ի հետ ուղիղ երկխոսությունից, պատրաստ է անուղղակի բանակցություններ վարել:
Հետևեք մեզ տելեգրամում
