Սեպտեմբերի 8-ին Թեհրանում կայացել է Հայաստանի, Իրանի և Հնդկաստանի արտաքին գործերի նախարարությունների տարածաշրջանային վարչությունների ղեկավարների մակարդակով երրորդ եռակողմ հանդիպումը։ Այդ մասին հայտնում է ՀՀ ԱԳՆ-ը։
Հայաստանի պատվիրակությունը ղեկավարել է ԱԳՆ Ասիայի և խաղաղօվկիանոսյան երկրների վարչության պետ Անահիտ Կարապետյանը, Իրանի պատվիրակությունը ղեկավարել է ԱԳՆ Հարավային Ասիայի հարցերով գլխավոր տնօրեն Մոհամմադ Ռեզա Բահրամին, իսկ Հնդկաստանի պատվիրակությունը՝ ԱԳՆ Պակիստանի, Աֆղանստանի և Իրանի վարչության պետ Անանդ Պրակաշը։
Կողմերը գոհունակություն են հայտնել հանդիպումների կանոնավոր կազմակերպման կապակցությամբ և ընդգծել նախկինում ընդունված որոշումների կատարման նշանակությունը։ Նրանք կարևորել են համագործակցության խորացումը՝ հատկապես հաղորդակցությունների, Հյուսիս-Հարավ միջազգային տրանսպորտային միջանցքի և Հայաստանի «Խաղաղության խաչմերուկ» ծրագրի շրջանակներում՝ օգտագործելով Չաբահարի նավահանգստի հնարավորությունները։
Բացի այդ, քննարկվել են տնտեսական, առևտրային, մշակութային և ժողովուրդների միջև կապերի ընդլայնմանը միտված նախաձեռնությունները։Փոխադարձ համաձայնությամբ որոշվել է հաջորդ եռակողմ հանդիպումը անցկացնել Հայաստանում։
Հետևեք մեզ տելեգրամում
