Գերմանիայի կառավարությունը պատրաստ է շարունակել աջակցել Հայաստանի եւ Ադրբեջանի՝ խաղաղությանն ուղղված առաջիկա քայլերին։ Այս մասին NEWS.am-ի հարցին ի պատասխան ասել է Հայաստանում Գերմանիայի դեսպան Կլաուդիա Բուշը։
«Ինչպես գիտեք, Գերմանիայի կառավարությունը շատ ակտիվ էր խաղաղության բանակցություններում․ մենք հնարավորություն տվեցինք հանդիպումներ կազմակերպելու Բեռլինում և տրամադրեցինք անհրաժեշտ աջակցություն, ինչի համար Հայաստանի և Ադրբեջանի կառավարությունները երախտապարտ էին։ Այժմ պետք է առաջ նայենք և տեսնենք՝ ինչ է սպասվում»,-ասել է դեսպանը։
Դեսպանի խոսքով՝ Գերմանիայի կառավարությունը պատրաստ է շարունակել աջակցել խաղաղության ուղղված առաջիկա քայլերին եւ այդ ուղղությամբ համագործակցում է թե Հայաստանի, թե Ադրբեջանի իշխանությունների հետ։
«Մենք դա անում ենք Հայաստանի կառավարության հետ այս կողմից եւ, ես գիտեմ, որ իմ գործընկերը Բաքվում նույնն է անում։ Երկար ճանապարհի մասին է խոսքը, բայց մենք նաև տեսել ենք երկար ժամանակահատված, երբ խաղաղ է եղել, և բախումներ չեն եղել։ Կարծում եմ՝ դա մեզ բոլորիս հույս է տալիս, և մենք պետք է շարունակենք այս ճանապարհով։ Կհասնենք խաղաղության, վստահ եմ»,-եզրափակել է դեսպանը:
Հետևեք մեզ տելեգրամում
