Հայաստանի ազգային հավաքականի գեղասահորդներ Սիմոն Դանիլյանցը, ինչպես նաև Կարինա Ակոպովա– Նիկիտա Ռախմանին զույգը չեն մասնակցի Գեղասահքի Եվրոպայի առաջնությանը` Մեծ Բրիտանիայի դեսպանատունը չի տրամադրել մուտքի վիզաները սահմանված ժամկետներում: Այդ մասին հայտնել է Հայաստանի գեղասահքի ֆեդերացիան:
Նշվում է, որ գեղասահքի Եվրոպայի առաջնությանը, որն անցկացվելու է Շեֆիլդ քաղաքում հունվարի 13-18-ը, 2025-2026թթ․ մրցաշրջանի ամենակարևոր մրցաշարերից մեկն է։
«Չնայած բոլոր անհրաժեշտ փաստաթղթերի ժամանակին ներկայացմանը, Մեծ Բրիտանիայի դեսպանատունը մեր մարզիկներին չի տրամադրել մուտքի վիզաները սահմանված ժամկետներում, ինչի արդյունքում մեր հավաքական թիմը զրկվեց Եվրոպայի առաջնությանը մասնակցելու հնարավորությունից։
Սա լուրջ հարված է մեր մարզիկների ամբողջ սեզոնային պատրաստությանը, մրցակցային զարգացմանը և միջազգային վարկանիշային դիրքերին։ Տարիների քրտնաջան աշխատանքը, պատրաստվածությունն ու նվիրումը չպետք է կախված լինեն վարչական ձգձգումներից։
Հայաստանի Գեղասահքի ֆեդերացիան անում է ամեն ինչ նման իրավիճակների կրկնությունը կանխելու և մեր մարզիկների իրավունքները պաշտպանելու համար։
Մենք շարունակելու ենք մեր պայքարը՝ հանուն հայկական գեղասահքի արժանապատիվ ներկայության միջազգային ասպարեզում»,-ասվում է հայտարարության մեջ:
Կարինա Ակոպովան շոկային է անվանել այդ նորությունը «Մատչ ՏՎ»-ին տված հարցազրույցում:
22-ամյա Ակոպովան հավելել է, որ չգիտի՝ արդյոք վիզայի խնդիրը կապված է այն փաստի հետ, որ զույգը ռուսական ծագում ունի։
«Իհարկե, շոկային է մեզ համար: Վիզա չտվեցին, թեև մեկ ամիս առաջ ենք դիմել՝ մինչև հիմա պատրաստ չէ: Այսօր Հայաստանում էինք, սպասում էինք վիզային, կարծում էինք, որ կստանանք, բայց, ցավոք, ոչ»,-ասել է նա:
Հետևեք մեզ տելեգրամում
